माघे संक्रान्तिको अवसरमा प्रदेश ५ को मुख्यमन्त्री कार्यालयमा शुभकामना आदानप्रदान कार्यक्रम
बुटवल । प्रदेश नम्बर पाँचका मुख्यमन्त्री शंकर पोखरेलले माघेसंक्रान्ति तथा माघी पर्वको अवसरमा मंगलबार मुख्यमन्त्री निवास बुटवलमा शुभकामना आदान–प्रदान कार्यक्रममा राखेका छन् ।
सो अवसरमा बोल्दै मुख्यमन्त्री पोखरेलले सामाजिक सद्भाव र एकताले समाजलाई समृद्धिको दिशामा लैजाने बताए ।
प्रदेश ५ मा विभिन्न जातजाति भाषाभाषीहरुको बसोबास भएको उल्लेख गर्दै मुख्यमन्त्रीले सबै जातजातिले मनाउने पर्वहरू उत्तिकै महत्त्वपूर्ण रहेको बताए ।
प्रदेश पाँचमा विशेष महत्वका साथ मनाइने माघी पर्वलाई सबै समुदायले महत्व दिएको बताउंदै मुख्यमन्त्री पोखरेलले यो सद्भावलाई सबैले आत्मसाथ गर्नुपर्नेमा जोड दिए ।
माघी पर्वको अवसरमा प्रदेश सरकारले माघ १ र २ गते सार्वजनिक बिदा दिएको छ । माघी पर्व मगर र थारु समुदायले विशेष महत्वका साथ मनाउँछन् ।
शुभकामना आदानप्रदान कार्यक्रममा प्रदेश प्रमुख धर्मनाथ यादव, न्यायधीश,मन्त्री तथा प्रदेश सभाका सदस्यहरुलगायतको उपस्थिति रहेको थियो ।