नेकपामा अब बरिष्ठ नेता २ जना
काठमाडौ । नेपाल कम्युनिस्ट पार्टी (नेकपा)को जारी केन्द्रीय समिति बैठकमा पेश भएको प्रसताव पारित भए अबदेखि दुई जना बरिष्ठ नेता हुनेछन् । बुधबारबाट सुरु भएको बैठकमा महासचिव विष्णु पौडेलले पेश गरेको विधान संशोधन प्रस्तावमा नेकपामा दुई बरिष्ठ नेता राख्न प्रस्ताव गरिएको छ । यसअघि नेकपामा एकजनामात्रै बरिष्ठ रहेका थिए । बरिष्ठ नेता को हुने भन्नेमा सो पार्टीमा विवाद नै भएको थियो ।
विवादपछि नेता झलनाथ खनालले बरिष्ठको पद पाएका थिए । त्यस्तै पौडेलको प्रस्तावमा उपाध्यक्षको समेत व्यवस्था गरिएको छ । प्रस्तावित विधान संशोधन प्रस्तावमा विधानको ‘धारा १८ (घ) १ को साविक व्यवस्थाको सट्टा दुई अध्यक्ष, दुई बरिष्ठ नेता, एक उपाध्यक्ष, एक प्रवक्ता र महासचिवसहित ४४१ सदस्यीय कमिटी भन्ने उल्लेख गर्ने’ प्रस्ताव गरिएको छ । यो प्रस्ताव पास भए अबदेखि नेकपामा दुई अध्यक्षसहित दुई बरिष्ठ नेता रहनेछन् । जसमा नेता माधव नेपाल थपिने निश्चित जस्तै छ ।