केथारसिस
शुक्रबार, २३ जेठ २०७७, १९ : ०५
कौरवहरूले जुरूक्क उठेर
रामको भजन गाउन थालेदेखि
देशको माटोले कालो गुलाबहरूको
साम्प्रदायिक खेती शुरू गरेको हो।
उनीहरू देशका अनुहारमा
धृतराष्ट्रका आँखा टाल्न चाहन्छन्
कौरवहरूलाई चिरहरण खुब मनपर्छ
चाहे त्यो द्रौपदीको होस् या संविधानको।
अतिबादको सुत्केरी ब्यथा लागेर
गोधरा फेरि ब्याउने तर्खरमा छ
लुते लोकतंत्रका ढल्नै लागेका
चौथो स्तंम्भहरू
हातमा टीआरपीको ट्रे बोकेर
सुसारे बनेर उभेका छन्।
निस्पट्ट कालो हिजाबभित्र
म जस्तै हजार-हजार मलाला,तस्लीमाहरु बाँच्दछन्
तर सिता र सती जलेको यो माटोमा
उनीहरूलाई फक्रनु वर्जित गरिएको छ
फूल्न प्रतिबन्ध लगाइएको छ
किन कि मलाला,तस्लीमाहरू
बाबाको होइन अबुको भाषा बोल्छन्।
ग्रेसी राई थुलुंग, मिरिक, दार्जिलिङ, भारत । हाल ईजरायल