न्याय
शनिबार, १० असोज २०७७, १० : ०९
अनकन्टार गाउँको छाप्रोमा
जीवन बिताइरहेको
एक नेपालीको फोटो
एकाबिहानै कसैले फेसबुकमा राख्यो
ऊ वनबाट पतकर र झिक्रा बटुलेर
खाना पकाउने गर्दो रहेछ
लाईक र कमेन्ट गर्न
उसको गरिबी र पछौटेपन
गजबको मसला भयो
फेसबुकमा राखिएको
उसको फोटो एकाएक भाइरल भयो
केही दिनभित्रै
कर्तव्यनिष्ठ पुलिसले उसलाई पक्राउ गर्यो
विद्वान सरकारी वकिलले
वन मासेको
अभियोगपत्र तयार गरेर
अदालतमा मुद्दा दायर गर्यो
सम्मानित अदालतले उसलाई
कैद र जरिवानाको फैसला गर्यो
ठीक त्यही दिनको साँझ
दरबारमार्गको सडकमा
सुनको झोला फ्याँकेर
तस्कर गायब भएको थियो, र
त्यसको केही दिनपछि
खुँखार हत्यारा
सम्मानित अदालतको आदेशबाट
बाइज्जत रिहा भएको थियो ।
***
२५ भाद्र २०७७