दर्शक नचाउँदै आर्थर गन
आर्थर गन अर्थात गायक दिवेश पोखरेलले बुटवलमा प्रस्तुती दिएका छन् । सो क्रममा उनले ‘के पीर पर्यो तिमीलाई?’ गीतबाट सुरु गरेका थिए । ‘लभ ईज माई रिडेम्पसन’, ‘न्यानो घर’ जस्ता उनका लोकप्रिय गीतहरुले दर्शकको निकै ताली पायो । समग्रमा दर्शकहरुले आर्थरका नेपाली र अंग्रजी गीतहरुको मजा लिए ।
उनले काठमाडौं, चितवन, बुटवल र पोखराका दर्शकहरुमाझ प्रस्तुती दिएपछि धरान, बिर्तामोड र किर्तिपुरलगायतका सहरहरुमा पनि प्रस्तुति दिने कार्यक्रम छ । सन् २०२० मा अमेरिकी गायन रियालिटी शो “अमेरिकन आईडल १८औं सिजन” को एक हिस्सा बनेपछि आर्थर गन्को लोकप्रियता बढेको हो । जहाँ उनले बब डिलनको गर्ल फ्रम द नर्थ कन्ट्री र क्रीडेन्स् क्लियरवाटर रिभाईभल्को ह्याब् यु एभर सिन द रेन नामक गीतहरु गाएका थिए । उनको प्रस्तुतीलाई सबै ३ निर्णायकहरुद्वारा धेरै प्रशंसा गरिएको थियो भने विश्व प्रसिद्ध गायिका केटि पेरीले उनलाई “हि ईज द बेस्ट” भनि प्रशंसा पनि गरेकी थिइन् । उनी उक्त शोको १८औं सिजनको उपविजेता रहेका थिए ।
उनै आर्थर अहिले टुबोर्ग होमकमिङ टुरमा संलग्न भएका हुन् । गोर्खा ब्रुअरीका मार्केटिङ डिरेक्टर, आशिष विष्ट भन्छन्,-“टुबोर्गको संगीतसँग लामो समयदेखि सम्बन्ध रही आएको छ । टुबोर्गले नेपाली संगीत क्षेत्रको उत्थान र संगीतको विभिन्न विधालाई सधैं समर्थन गर्दै आएको छ । सोही समर्थनलाई निरन्तरता दिँदै आर्थर गनसँग आबद्ध हुन पाउँदा निकै गर्व महसुुस गरेका छौं किनभने उनले आफ्नो संगीतमार्फत नेपाली संगीत प्रेमीहरुलाई गौरवान्वित बनाएका छन् ।”