चाडपर्व फर्कि आयो तर छोरो आएन
वर्ष दिन पुरा भयो दसैँ फर्कि आयो तर मेरो छोरो आएन
वर्ष दिन पूर्ण हुन्छ, दसैँ फर्कि आउँछ तर मेरो छोरो आउँदैन
कस्तो छोरो जन्म दिएछु मैले कहिल्यै आमाबुबा भन्दैन
गाको थियो परदेश धनकमाउनलाई तर छोरै फर्किआएन
आयो त केवल उसको सम्झना हरपल हामी आमाबाबालाई
आउँछन् अरुका छोरा बुहारी नाति नातिना, ल्याउँछन् कोशेली
हाम्राले के ल्याउथे र, फर्कि आउँदैनन् बुढा बाआमा सम्झी
भन्थे बुढापाकाहरुले, बाह्र वर्षमा खोला समेत फर्किन्छ भनेर
तर, हाम्रा सन्तानहरु फर्केनन् बुढा बाआमालाई सम्झेर
हामी तेल सकिन लागेको दियोझै भएका छौ,आज हो कि भोलि
चाडपर्व आउँदा हुन्छ गाउँमा रमझम,सबैको घरमा भरिभराउ
हाम्रा घरमा सदाबहार, जहिलै पनि मात्र दुई बुढाबुढी
सोध्ने गर्छन् गाउँकाले,कहिले आउँछन् तिम्रा छोरा बुहारी ?
खै के उत्तर दिने हो गाउँलेहरुलाई,निःशब्द छौ हामी बुढाबुढी नै
अरु बेला त त्यस्तै हो चाडबाडको बेलामा आउँदो रैछ धेरै याद
खै, कहिलेसम्म पो भगवानले दिने रैछन् हामी बुढाबुढीलाई साथ ।
रिकेश निरौला