गुनासो बढेपछि विभागले थाल्यो अभिमूखिकरण तालिम दिने संस्थाको अनुगमन
वैदेशिक रोजगार विभागले अभिमुखीकरण तालिम दिने संस्थाहरूको अनुगमन थालेको छ । वैदेशिक रोजगारीमा जाने कामदारहरूलाई अभिमुखीकरण तालिम दिने संस्थाहरूमा अनुगमन थालेको हो । अभिमुखीकरण तालिम दिने संस्थाहरूको बारेमा विभिन्न किसिमका गुनासाहरू आउने गरेको भन्दै विभागले अनुगमन कार्यलाई प्रभावकारी रूपमा अगाडि बढाएको जनाएको छ ।
विभागको टोलीले आज काठमाडौंका विभिन्न स्थानमा रहेका ६ वटा अभिमुखीकरण तालिम दिने संस्थाहरूको अनुगमन गरेको थियो । यसलाई भोलिका दिनहरूमा अझ कडाईका साथ अनुगमन गरिने विभागका निर्देशक कुष्णप्रसाद भुसालले जानकारी दिए ।
अनुगमन कार्यलाई काठमाडौं उपत्यका बाहिरका संस्थाहरूमा पनि निरन्तरता दिइने विभागले जनाएको छ । वैदेशिक रोजगार नियमावली २०६४ ले वैदेशिक रोजगारीमा जाने कामदारहरूले अनिवार्य रूपमा अभिमुखीकरण तालिम लिनुपर्ने व्यवस्था गरेको छ । सोही आधारमा तालिम प्रदायक संस्थाहरू दर्ता भई कार्य सञ्चालन गर्दै आएका छन् । तर, कतिपय संस्थाले तालीमै नदिने गरेको गुनासो आउन थालेपछि विभागले यसअघि सचेत गराएको थियो ।