प्रिमियर लिगमा आज पाँच खेल
शनिबार, १९ कात्तिक २०७९, ११ : ३२
प्रिमियर लिग फुटबलमा आज पाँचवटा खेलहरू हुँदैछन् । आज हुने खेलमा दोस्रो स्थानमा म्यानचेस्टर सिटीले फुलहमसँग प्रतिस्पर्धा गर्दैछ ।
दुई टोलीबीचको खेल नेपाली समय अनुसार साँझ ८ः४५ मा सुरु हुनेछ । घरेलु मैदानमा हुने खेलमा सिटी सहज जित निकाल्दै अङ्क तालिकाको शीर्ष स्थानमा उक्लने योजनामा छ । यता फुलहम पनि आजको खेलमा जित निकाल्दै तालिकाको एक स्थान माथि उक्लने योजनामा छ । सिटी १२ खेलबाट २९ अङ्क जोडेर तालिकाको दोस्रो स्थानमा छ भने फुलहम १३ खेलबाट १९ अङ्क जोडेर तालिकाको सातौँ स्थानमा छ ।
यसै समयमा हुने अर्को खेलमा नटिङहम फरेस्टले ब्रेन्टफोर्डसँग प्रतिस्पर्धा गर्दा उल्भ्सले ब्राइटनलाई आथित्यता प्रदान गर्दैछ । यता लिड्स युनाइटेडले बर्नमाउथसँग प्रतिस्पर्धा गर्दैछ । आज हुने अन्तिम खेलमा एभर्टनले लेस्टर सिटीसँग प्रतिस्पर्धा गर्दैछ ।