अपडेट : पेसावरको मस्जिदमा आत्मघाती हमला, २९ को मृत्यु, १५८ घाइते
पाकिस्तानको पेसावर सहरको मस्जिदमा नमाजको क्रममा विस्फोट भएको छ । पेसावरको लेडी रिडिङ अस्पतालका प्रवक्ता डा आजमका अनुसार प्रहरी लाइन मस्जिदमा सोमबार दिउँसो नमाजको समयमा भएको विस्फोटमा मृत्यु हुनेको सङ्ख्या २९ पुगेको छ ।
मृत्यु हुनेमा प्रहरी पनि रहेको उनले बताए । प्रवक्ताका अनुसार यस विस्फोटमा करिब १५८ जना घाइते भएका छन् जसमध्ये १० जनाको अवस्था गम्भीर छ ।
डा. आजमका अनुसार लेडी रिडिङ अस्पतालको अवस्थालाई ध्यानमा राखेर आपत्काल लागू गरिएको छ । पाकिस्तानका विदेश मन्त्री बिलावल भुट्टो जर्दारीले आक्रमणको निन्दा गर्दै आतङ्कवाद र यसका सहयोगीहरूलाई कडाइका साथ कारबाही गरिने बताएका छन् ।
पेसावर विस्फोटबारे पाकिस्तानका पूर्व प्रधानमन्त्री तथा पिटिआई अध्यक्ष इमरान खानले भने, ‘पेसावर पुलिस लाइन्सको मस्जिदमा भएको विस्फोटको कडा निन्दा गर्दछ । पीडितका परिवारप्रति समवेदना ।’
Strongly condemn the terrorist suicide attack in police lines mosque Peshawar during prayers. My prayers & condolences go to victims families. It is imperative we improve our intelligence gathering & properly equip our police forces to combat the growing threat of terrorism.
— Imran Khan (@ImranKhanPTI) January 30, 2023
‘आतङ्कवादको खतरासँग लड्नका लागि हामीले हाम्रो खुफिया तन्त्रमा सुधार गर्न र हाम्रा प्रहरीहरूलाई पर्याप्त हतियारहरूले सुसज्जित गर्न आवश्यक छ ।’
पाकिस्तानका विदेश मन्त्री बिलावल भुट्टोले यस हमलाको निन्दा गर्दै चुनावअघि भएको यो विस्फोट निन्दनीय रहेको बताएका छन् । उनले आतङ्कवादी र तिनका सहयोगीलाई कडा कारबाही गरिने बताए ।
बिलावल भुट्टो जरदारीले एक विज्ञप्तिमा भने, ‘नेशनल एक्सन प्लान नै आतंककारीहरूको उपचार हो, यसलाई कडाइका साथ लागू गरिनेछ । पीपीपी कार्यकर्ता र अधिकारीहरूले रक्तदान गरेर घाइतेहरूको जीवन बचाउनु पर्छ ।’