सुदूरपश्चिम सरकारबारे देउवा र नेपालबीच छलफल
काठमाडौं । नेपाली कांग्रेसका सभापति शेरबहादुर देउवा र नेकपा एकीकृत समाजवादीका अध्यक्ष माधव कुमार नेपालबीच भेटवार्ता भएको छ । शुक्रबार बिहान देउवाको निवास धुम्बाराहीमा सुदूरपश्चिम प्रदेश सरकारका सन्दर्भमा उनीहरुबीच छलफल भएको हो ।
नेकपा एमाले नेतृत्वको सरकारले विश्वासको मत पाउन नसकेपछि सुदूरपश्चिममा बिहीबार कांग्रेसको नेतृत्वमा सरकार बनेको छ ।
प्रदेशसभाको सबैभन्दा ठूलो दलको हैसियतले कांग्रेस संसदीय दलका नेता कमलबहादुर शाह मुख्यमन्त्री बनेका छन् । शुक्रबार उनले शपथ ग्रहण गर्ने कार्यक्रम छ । देउवा र नेपालको छलफलपछि मुख्यमन्त्री शाहसँगै कांग्रेस र एकीकृत समाजवादीबाट एक एक जना मन्त्री बनाउने तयारी छ ।
कांग्रेसबाट सांसद प्रकाश देउवा र एकीकृत समाजवादीबाट नरेश शाही मन्त्री बन्ने भएका छन् । माओवादी र नागरिक उन्मुक्ति पार्टीलाई पनि सरकारमा सहभागी गराउने उद्देश्यले आज दुई जना मात्र मन्त्री नियुक्त गरिने कांग्रेसका एक सांसदले रातोपाटीलाई बताए ।