चीनले आफ्नो परमाणु हतियार तीव्र रूपमा बढाइरहेको नेटोले बताएको छ । सन् २०३५ सम्म चीनसँग करिब १५ सय परमाणु हतियार हुनसक्ने नेटोले सम्भावना व्यक्त गरेको छ ।

नेटोका सेक्रेटरी जेन्स स्टोल्टनबर्गले मङ्गलवार भने, ‘लामो अवधिका लागि हामीले थप खतरनाक र प्रतिस्पर्धी दुनियाँका लागि आफ्नो दृष्टिकोणमाथि पुनर्विचार गर्न आवश्यक छ । यसको अर्थ यो हो कि चीनसँग छलफल गर्न आवश्यक छ । यो देशसँग सन् २०३५ सम्म १५ सय परमाणु हतियार हुनसक्ने अनुमान छ ।’

‘विश्वव्यापी शक्तिको रूपमा चीनका थुप्रै जिम्मेवारी छन् र चीनलाई पनि हतियार नियन्त्रण सम्झौताको पारदर्शिताबाट फाइदा हुनेछ ।’

स्टोल्टनबर्गले थपे, ‘हामी चीनलाई विरोधी मान्दैनौँ तर चीन हाम्रो हित, नेटोको मूल्य र हाम्रो सुरक्षाका लागि केही चुनौती पेस गर्छ । त्यसैले चीनसँगको छलफल गर्न थप आवश्यकता छ ।’

In the face of threats emanating from Russia, China and other actors, NATO is "determined" to increase its readiness for armament control and maintain communication with the necessary actors, the alliance's chief Jens Stoltenberg said https://t.co/DcqKXemCEY pic.twitter.com/VyPiy6vvDl

— ANADOLU AGENCY (@anadoluagency) April 18, 2023

नेटोले आफ्नो बयानमा भनेको छ – चीनले हतियारको विषयमा पारदर्शिता देखाइरहेको छैन र लगातार आफ्नो परमाणु हतियारको भण्डारमा वृद्धि गरिरहेको छ ।

यस्तै, अमेरिकाकी उप–विदेश मन्त्री वेन्डी शेरम्यानले अमेरिका चीनसँग कुनै विवाद नचाहने स्पष्ट पारेकी छिन् । उनले भनेकी छिन्, ‘अमेरिका चीनसँग कुनै विवाद नचाहेर राम्रो प्रतिद्वन्द्वी बन्न चाहन्छ र हामी चीनसँगको प्रतिस्पर्धालाई अगाडि बढाउन चाहन्छौँ भन्ने प्रस्ट पार्न चाहन्छौँ ।’