काठमाडौँ । साउदी भिसा सेन्टर खोल्ने विषयमा थप छलफल आवश्यक रहेको श्रम, रोजगार तथा सामाजिक सुरक्षा मन्त्रालयले जनाएको छ । परराष्ट्र मन्त्रालयलाई पत्राचार गर्दै उक्त विषयमा थप छलफल आवश्यक रहेको जनाएको हो ।

साउदी अरेबियामा भिसा तथा यात्रासम्बन्धी कार्य गर्नका लागि भन्दै भीएफएस ग्लोबल सर्भिसेज् नेपाल मार्फत कार्य गर्नका लागि परराष्ट्रले सहमति जनाएको थियो ।

उक्त विषयमा श्रम मन्त्रालयलाई समेत जानकारी गराएको थियो । त्यसपछि वैदेशिक रोजगार व्यवसायी संघ लगायतले विरोध जनाउँदै श्रममन्त्री शरतसिंह भण्डारीलाई ज्ञापनपत्र बुझाएको थियो ।

त्यस्तै अन्य सरोकारवाला निकायले समेत विरोध जनाउँदै आएका छन् । त्यसरी भिसा सेन्टरमार्फत कामदार पठाउँदा नेपाली श्रमिकहरूलाई थप आर्थिक दायित्व पर्न जानेछ । यस क्षेत्रमा एकाधिकार सिर्जना हुने समेत देखिएको भन्दै सरोकारवाला निकायबाट जानकारी आएको मन्त्रालयले जनाएको छ ।

‘... नेपाल बैदेशिक रोजगार व्यवसायी सङ्घ एवम् यस क्षेत्रमा कार्यरत  Recruitment Agencies बाट विरोध स्वरूप विज्ञप्ति प्रकाशन भएको सन्दर्भमा श्रमिकको हकहितलाई प्रमुख प्राथमिकतामा राखेर मात्र यस प्रकारका निर्णयहरू कार्यान्वयन गर्नुपर्ने देखिएको छ ।’ परराष्ट्रलाई पठाइएको पत्रमा उल्लेख गरिएको छ ।

यो पनि

साउदी भिसा सेन्टर खोल्न ‘भीएफएस ग्लोबल सर्भिसेज नेपाल’ को नाममा कम्पनी दर्ता

उक्त कार्यलाई थप व्यवस्थित गर्नको लागि छलफल एवम् सहमति आवश्यक देखिएकोले त्यसका लागि कूटनीतिक पहल गर्नुपर्ने मन्त्रालयले निर्णय गरेको थियो ।  

साउदी दूतावासको विशेष चासोमा केही व्यवसायीको मिलेमतोमा साउदी भिसा सेन्टर खोल्न लागिएको छ । त्यसका लागि कम्पनी रजिस्ट्रारको कार्यालय भीएफएस ग्लोबल सर्भिसेज् नेपाल नामक कम्पनी खोलिएको छ । साउदीकै वल्र्डवाइड होल्डिङस नामक कम्पनीले भिसा सेन्टर सञ्चालन गर्न लागेको हो । त्यसका लागि नेपालबाट दुई जना नेपाल प्रतिनिधि रहेका छन् ।

यसरी खोल्न लागिएको भिसा सेन्टरले वैदेशिक रोजगारीमा जाने कामदारको पासपोर्ट र आवेदन सङ्कलन गर्ने कार्य गर्नेछ । त्यसका लागि श्रमिकले हजार रुपैयाँ अतिरिक्त शुल्क तिर्नुपर्नेछ ।

व्यवसायीहरूले श्रमिकमाथि थप आर्थिक भार पार्ने र व्यवसायमा नै सिन्डिकेट लाद्न खोजिएको भन्दै चर्को विरोध गर्दै आएका छन् ।