अनुहारको हेरचाहका लागि मानिसले धेरै पैसा खर्चिने गर्छन् तर कुहिनो र घुँडाको छालालाई भने बेवास्ता गर्छन् । यस्तै बेवास्ताका कारण कुहिनो र घुँडामा फोहोर जम्मा हुन थाल्छ र कालोपन बढ्दै जान्छ । यस्तो अवस्थामा तपाईंले छालाको हेरचाह गर्न केही टिप्स अपनाएर कुहिनो र घुँडाको छाला मिनेटमै सफा गर्न सक्नुहुन्छ ।

अनुहारको छालाको हेरचाह गर्नु मानिसको दिनचर्यामा नै पर्छ तर कुहिनो र घुँडाको ख्याल राखिएको हुँदैन । यस्तो अवस्थामा यी ठाउँको छाला खस्रो, सुख्खा र कालो हुन्छ । यसलाई सफा गर्न, तपाईं यहाँ उल्लेख गरिएका विधिहरू प्रयोग गर्न सक्नुहुन्छ ।

कागती– बेकिङ सोडा प्रयोग गर्नुहोस्

तपाईं घुँडा र कुहिनोको छाला सफा गर्न कागती र बेकिङ सोडा प्रयोग गर्न सक्नुहुन्छ । यसका लागि कागतीलाई दुई भागमा काटेर त्यसमा एक चम्चा बेकिङ सोडा हालेर हलुका हातले घुँडा र कुहिनोमा करिब पाँच मिनेटसम्म रगड्नुहोस् । त्यसपछि सफा पानीले धुनुहोस्, यसले तपाईंको छालामा चमक ल्याउनेछ ।

दूध–एलोभेरा जेलको मद्दत लिनुहोस्

एलोभेरा जेल र दूधको मद्दतले तपाईं घुँडा र कुहिनोको कालोपन हटाउन सक्नुहुन्छ । यसका लागि राति सुत्नुअघि दुई चम्चा एलोभेरा जेलमा त्यति नै मात्रामा दूध मिसाउनुहोस् । त्यसपछि यो मिश्रण कुहिनो र घुँडामा राम्रोसँग लगाउनुहोस् र सुत्नुहोस् । बिहान सफा पानीले धुनुहोस् । यसले छालाको कालोपन पनि हटाउँछ ।

आलुको रस लगाउनुहोस् 

आलुको रस कुहिनो र घुँडाको फोहोर र कालोपन हटाउन पनि प्रयोग गर्न सकिन्छ । यसका लागि दुई वटा आलुलाई ताछ्नुहोस् र त्यसपछि यसलाई कोरेसोमा कोर्नुहोस् । त्यसपछि यसलाई निचोरेर रस निकाल्नुहोस् । अब यो रसलाई छालामा लगाएर १५ मिनेटका लागि छोड्नुहोस् । त्यसपछि दुई मिनेटसम्म रगड्नुहोस् र सफा पानीले धुनुहोस् । यसले छाला सफा र नरम हुनेछ ।

काँक्रोले पनि काम गर्नेछ

कुहिनो र घुँडाको कालोपन हटाउन काँक्रो पनि उपयोगी हुन्छ । यसका लागि काँक्रोका टुक्राहरू काटेर कुहिनो र घुँडामा बिस्तारै दस मिनेटसम्म रगड्नुहोस् । त्यसपछि यसलाई सुक्न  छोड्नुहोस् । सुकेपछि चिसो पानीले धुनुहोस् । यसो गर्दा छालाको कालोपन पनि केही दिनमै हटेर छाला नरम हुने गर्छ ।