विश्व क्रिकेटको दुर्लभ नतिजा : बराबरीमा सकियो वेस्ट इन्डिज र नेदरल्यान्ड्सबीचको खेल
काठमाडौँ । आईसीसी एकदिवसीय विश्वकप छनोट प्रतियोगिताको सोमबार भएको समूहगत चरणको अन्तिम खेल बराबरीमा सकिएको छ । दुई पटकको विश्वकप विजेता वेस्ट इन्डिज र नेदरल्यान्ड्सबीचको खेल बराबरीमा सकिएको हो ।
विश्व क्रिकेटमा यो दुर्लभ नतिजा हो । खेलका क्रममा नेदरल्यान्ड्सले वेस्ट इन्डिजलाई गतिलो चुनौती दियो । पहिलो ब्याटिङ गरेको वेस्ट इन्डिजले निर्धारित ओभरमा ६ विकेट गुमाएर तीन सय ७४ रन बनाएको थियो । जवाफी ब्याटिङमा ओर्लिएको नेदरल्यान्ड्सले पनि निर्धारित ओभरमा नौ विकेट गुमाएर तीन सय ७४ रन नै बनायो ।
अर्को खेलमा जिम्बाबेले अमेरिकालाई तीन सय चार रनको फराकिलो अन्तरले हरायो । पहिलो ब्याटिङ गरेको जिम्बाबेले निर्धारित ओभरमा ६ विकेट गुमाएर चार सय आठ रन बनाएको थियो । जवाफी ब्याटिङमा ओर्लिएको अमेरिकाले भने २५.१ ओभरमै अलआउट हुनुअघि एक सय चार रनमात्र बनाउन सक्यो । विश्वकप छनोट खेल जिम्बाबेमा भइरहेको छ । नेपाल भने उपाधि होडबाट यसअघि नै बाहिरिएको छ ।