यू-१६ इस्ट जोन कप विजेता टोलीका तीन खेलाडी सम्मानित
काठमाडौँ । अघिल्लो साता मलेसियामा सम्पन्न एसीसी यू-१६ इस्ट जोन कप क्रिकेट प्रतियोगिताको उपाधि विजेता नेपाली टोलीका तीनजना खेलाडीलाई आइतबार एसपीए कलेजले कैलालीको धनगढीमा सम्मान गरेको छ ।
नेपाली टोलीमा रहेका सुदूरपश्चिम तीनजना खेलाडी विकेटकिपर ब्याट्सम्यान आशिष लुहार, ओपनर ब्याट्सम्यान नरेन भट्ट र अशोक धामीलाई कलेजले सम्मान गरेको हो ।
फाइनलमा घरेलु टोली मलेसियामाथि दुई सय २१ रनको सानदार जित हात पार्दै नेपालले लगातार तेस्रो पटक यू-१६ इस्ट जोन कपको उपाधि चुमेको थियो ।
कञ्चनपुरका आशिष एसपीए क्रिकेट टोलीको पनि कप्तान हुन् । उनी एसपीए कलेजमा कक्षा १२ मा अध्ययनरत छन् । फाइनलमा शतक प्रहार गरेका ओपनर ब्याट्सम्यान नरेन बैतडी जिल्लाका हुन् । अशोक भने बझाङ जिल्लाका खेलाडी हुन् ।
तीनैजनालाई एसपीएले स्नातकोत्तरसम्म निःशुल्क अध्ययन गराउने घोषणा गरेको छ । एसपीएले धनगढी क्रिकेट एकेडेमीमा तीनैजनालाई निःशुल्क प्रशिक्षणको समेत व्यवस्था मिलाइने बताएको छ । क्याम्पस प्रमुख योगराज उपाध्यायले देशकै नाम उच्च पारेका खेलाडीलाई सम्मान गर्न पाउँदा निकै खुसी लागेको बताए ।
उनले एसपीए कलेजमा अन्तर्राष्ट्रिय क्रिकेट खेल्ने आठजना खेलाडी अध्ययन गरिरहेको बताउँदै खेलाडी र एसपीए एकअर्काको पर्याय बनेको धारणा व्यक्त गरे । खेलाडीका तर्फबाट आशिषले सम्मानका लागि एसपीए कलेजलाई धन्यवाद दिए । उनले गृहनगरमा सम्मानित हुन पाउँदा निकै खुशी लागेको बताए ।