सृष्टि महर्जन केही दिन पहिले दुबईमा आयोजित अन्तर्राष्ट्रिय सौन्दर्य प्रतियोगिता ‘मिस स्टार युनिभर्स २०२३’ की शीर्ष विजेता हुन् । १९ देशका प्रतिस्पर्धीलाई पछि पार्दै उपाधि चुमेकी उनले प्रतियोगितामा ‘मिस गर्जियस’ र ‘मिस प्राइड अफ स्टार युनिभर्स’ सबटाइटलसमेत हात परेकी थिइन् । दर्जनभन्दा बढी म्युजिक भिडियो अभिनय गरिसकेकी महर्जन नृत्यमा पनि रुचि राख्छिन् ।

‘मिस स्टार युनिभर्स २०२३’ मा उनले नेपाली मौलिक कुमारी नृत्य प्रस्तुत गरेकी थिइन् । यसले उनलाई अन्तर्राष्ट्रिय ताजको हकदारसमेत बनायो । महर्जनको रुचि फिल्म अभिनयतिर पनि छ । नेपालका केही फिल्मको अफर रिजेक्ट गरेकी उनलाई दुबईको स्टेजमै आधा दजर्न फिल्मका अफर मिलेका छन् । तर उनले अभिनय गर्ने नगर्ने अहिलै निधो गरिसकेकी छैनन् । उनै सृष्टि महर्जनसँग सौन्दर्य प्रतियोगिता र अभिनय सम्बन्धमा रातोपाटीले राखेका केही प्रश्न ।

अन्तर्राष्ट्रिय प्रतियोगिता ‘मिस स्टार युनिभर्स २०२३’ को शीर्ष उपाधि जित्नुभएको छ, कस्तो लागिरहेको छ ?
एकदमै खुसी छु । यो एउटा अन्तर्राष्ट्रिय उपाधि हो । पहिलो पटक प्रतियोगिता जाँदै गर्दा बिजेता बन्छु होला भन्ने लागेको थिएन । पहिलो पटक प्रतियोगितामा जाँदा नर्भस थिएँ, एक्साइटेट थिएँ । अन्तर्राष्ट्रिय प्लेटफर्ममा देशको प्रतिनिधित्व गर्न पाएँ । त्यसमा पनि शीर्ष उपाधिसमेत हात पर्यो । एकदमै गर्व महसुस भएको छ, धेरै खुसी छु । अन्तर्राष्ट्रिय प्रतियोगितामा ठुलै प्रतिस्पर्धा हुन्छ । शीर्ष विजेताका रूपमा नाम घोषणा हुँदा विश्वास गर्न गाह्रो पर्दाे रहेछ ।

विजेताका रूपमा आफ्नो नाम घोषणा हुँदा पत्याउन सक्नुभयो नि ?
त्यो माहोल अहिले वर्णन गर्न सक्दिनँ । त्यो फेरि नदोहोरिने समय हो । विजेतामा कसको नाम आउला, म बन्छु कि बन्दिनँ भन्ने कुराले त्यो समय मेरो मात्र होइन सबै प्रतियोगीको मुटुको रफ्तार बढेको देखिन्थ्यो । विजेतामा आफ्नो नाम घोषणा हुँदा एकछिन त ‘सक’ भएँ, पत्याउन सकिनँ । धेरै समयको मेहनतको फल मिल्यो भन्ने लाग्यो ।

प्रतियोगितामा जाँदै गर्दा उपाधि चुम्छु भन्ने थियो त ?
जोसुकै प्रतियोगी पनि प्रतियोगिता उपाधि जित्ने लक्ष्यसहित सहभागी भएको हुन्छ । मैले जिन्नुपर्छ, जित्छु भन्ने हुन्छ । ममा पनि त्यही थियो । नेपालले अन्तर्राष्ट्रिय प्रतियोगितामा खासै सफलता हासिल सकेको देखिन्न । त्यो हिसाबले पनि मलाई यो प्रतियोगिता जित्नुपर्छ भन्ने थियो ।

१९ देशका एक से एक प्रतियोगीलाई पछि पार्न मेहनत धेरै गर्नुपर्यो होला ?
सबै प्रतियोगी आफ्नो देशमा बेस्ट भएर छानिएर आएका थिए । उनीहरू सबैको लक्ष्य प्रतियोगीताको शीर्ष उपाधि नै थियो । सबैभन्दा उत्कृष्ट हुन मेहनत गर्नुपथ्र्याे । त्यो पहिले बुझेको आफूलाई त्यसरी नै अगाडि बढाए ।

नेपालका लागि तपाईंको जित कस्तो उपलब्धि हो ?
एउटा अन्तर्राष्ट्रिय प्रतियोगितामा नेपालले सफलता पाउनु भने राम्रो उपलब्धि हो । त्यहाँ देशको चर्चा भएको छ । म प्रतियोगितामा सृष्टि भएर भन्दा पनि नेपाल भएर सहभागी भएको थिए । त्यहाँ सबैलाई उपाधि आफैँले जित्छु भन्ने लाग्थ्यो । त्यस्तो माहोलमा मैले जित्नु भनेको देशको नाम राख्नु हो । देशको नाम रहनु भनेको सबैका लागि राम्रो हो ।

कसरी चिनाउनु भयो नेपाल ?
म डान्सर पनि हो । त्यसैले प्रतियोगिताको ट्यालेन्ट राउन्डका लागि मैले नेपाली कुमारी नृत्यको प्रस्तुति तयार गरेको थिएँ । जसमा नेपालको विषयको न्यारेसन, नेपाली विभिन्न सङ्गीतको मिश्रणसहित कम्पोज गरेको थिएँ । नृत्यको कन्सेप्ट नै समग्र नेपाल चिनाउने खालको थियो । मेरो नृत्यको त्यहाँ सबैले तारिफ गरे । 

अबका दिनका चुनौती केकस्ता देख्नुभएको छ ?
अन्तर्राष्ट्रिय प्रतियोगिताको विजेता बनेपछि धेरैका आँखा मतिर तेर्सिएका छन् । मैले गर्ने क्रियाकलापले ठुलो अर्थ राख्छ । अबको दिनमा योभन्दा पनि ठुलो उपलब्धि मैले हासिल गर्नुपर्छ । त्यसैले अबको मेरो लक्ष्य ‘मिस वल्र्ड’ को छ ।

अन्य देशका सहभागीसँग सम्बन्ध कस्तो रह्यो ?
सबै देशका सहभागीसँग आत्मीय सम्बन्ध बन्यो । धेरै देशमा सहभागीले उनीहरूको देश भ्रमणका लागि निम्तोसमेत दिए । मैले पनि सबैलाई नेपाल भ्रमणको निम्तो पनि दिएँ । मैले नेवारी कल्चरको पर्स लगेको थिएँ । त्यो सबैलाई गिफ्ट गरेँ । मैले पनि नेपालको सुन्दरताको वर्णन गर्दै नेपाल आउने निम्तो दिएँ ।

शीर्ष उपाधिको अलवा आफूमा परिवर्तन के पाउनुभयो ? 
प्रतियोगिताबाट कम्युनिकेसन धेरै महत्त्वपूर्ण भन्ने विषय बुझेँ । जबसम्म हामी कुराकानी एकअर्काेसँग सेयर गर्न सक्दैनौँ तबसम्म अगाडि बढ्न सक्दैनौँ । कम्युनिकेसन भनेको अगाडि बढ्ने एउटा साचो नै रहेछ । हामीले सबैसँग सम्पर्क बढाउनुपर्दाे रहेछ ।

अभिनयतिर पनि रुचि हो ?
अभिनयमा पहिलेदेखि नै रुचि छ । म नृत्यबाटै अगाडि बढेको भएकाले म्युजिक भिडियो अभिनय गरिसकेकी छु । केही फिल्मको अफर पनि आएको थियो । दुबईको प्रतियोगितामा विभिन्न देशका निर्माता, निर्देशक पनि सहभागी थिए । त्यहाँ उपाधि चुमेसँगै करिब आधा दर्जन फिल्मको अफर मिलेको छ । त्यसमा केही छोटा र केही लामा फिल्म छन् । 

मैले त्यहाँ अभिनय गर्ने नगर्ने केही प्रतिक्रिया दिइनँ । अफर गर्नेसँग सम्पर्क साटासाट गरेकी छु । भोलिका दिनमा काम गर्न पनि सक्छु ।

सानैदेखि यही सपना थियो त ? 
सानैदेखि म नृत्यमा राम्रो कोरियोग्राफर भएर सफल महिलाका रूपमा चिनिन चाहन्थेँ ।

प्रेम त पक्कै होला ?
अहिलेसम्म त छैन, जीवन अगाडि बढ्दै जाँदा अब हुन सक्छ । त्यो स्वाभाविक हो ।

कस्तो जीवनसाथीको चाहना छ ?
एकअर्काेलाई बुझ्ने, ख्याल गर्ने र दुःखसुख दुवैमा सहारा बन्न सक्ने ।

मनपर्ने हिरो ?
बलिउड अभिनेता शाहरूख खान ।

खुसी ?
मलाई खुसी हुनका लागि ठुलो कारण केही चाहिँदैन । कतै राम्रो कुरो भइरहेको, आफैँलाई सफलता मिलिरहेको छ भने खुसी हुन सक्छु । 

कस्तो समय रुनुहुन्छ ?
उमेर टिनएज क्रस भएपछि कहिले काही स्ट्रगल फिल हुन्छ । कहिलेकाहीँ आफूलाई अरूले नबुझेको जस्तो लाग्छ । त्यो समय म रुन थाल्छु ।

सौन्दर्य प्रतियोगिताको विजेताको हिसाबले यसमा करियर बनाउन चाहनेलाई के सुझाव दिनुहुन्छ ?
सौन्दर्य मात्र होइन, जुनै पनि क्षेत्रमा आफूलाई अगाडि बढाउन पहिले आफ्नो चाहना, क्षमता चिन्नुपर्छ । आफूमा जे प्रतिभा छ, त्यो चिनेर अगाडि बढ्न सकियो भने  सफलता मिल्छ ।