ईश्वर कहाँ छैन ?
तिमी सोध्छौ,
ईश्वर कहाँ छ ?
म भन्छु
सुन्ने कानमा छ
हेर्ने आँखामा छ
धड्किरहने मुटुको
हर धड्कनमा छ
नदेखिने यी कण कणमा छ ।
भन,
ईश्वर कहाँ छैन ?
दूध पिलाउने शिशुको
आमाको स्नेहमा छ
नव मण्डलमा पाइने
समस्त जीवमा छ
नील गगनमा उदाउने
तारा पुञ्जमा छ
प्रभातसँगै झुल्किने
अरुणोदयमा छ ।
भन,
ईश्वर कहाँ छैन ?
मगमग भई फुलिरहने
फूलको परागमा छ,
नदी किनारमा पौडिरहने
पत्थरको स्पर्शमा छ
बतासिएर झुलिरहने
वृक्षको तरङ्गमा छ
बताससँगै गुनगुनाइ रहने
लतिफाका ती पातहरुमा छ ।
भन,
ईश्वर कहाँ छैन ?
चहराइ रहेको मान्छेको
घाउहरुमा छ
आवाज विहीनहरुको
आवाजमा छ
पीडितहरुको क्रन्दनमा छ ।
भन,
ईश्वर कहाँ छैन ?
दृष्टि तिम्रो भ्रम हुँदा
उ कहीँ पनि देखिदैन
तिम्रो हेर्ने दृष्टि फेरिदा
जताततै उ नै उ छ
भन त अब,
ईश्वर कहाँ छैन ?
बकैया–८, मकवानपुर