काठमाडौँ। फिल्म रिलिजको समय त्यसका मुख्य कलाकार नायक–नायिकाको ब्यस्तता निकै बढ्छ । हलसम्म दर्शक तान्ने अस्त्र नै उनीहरू भएकोले निर्माण युनिटले प्रेसमिट, पब्लिक प्लेस प्रचारदेखि मिडिया हाउससम्म उनीहरूलाई दौडाउँछन् । सिधै भन्नुपर्दा यो समय कलाकारको खाने, बस्ने र सुत्ने ठेगानसमेत हँुदैन ।

एउटा फिल्म रिलिज समयको रुटिन त यस्तो हुन्छ भने कुनै मुख्य कलाकारको एकै समय दुई फिल्म रिलिज भए हालत के होला ? उसले सास फेर्ने फुर्सद पाउँदैन । तनावको कुरै छाडौ, कहाँ जाने, के गर्ने । कुन फिल्मको प्रचारलाई प्राथमिकता दिने ? त्यसै अलमल हुन्छ ।

अभिनेता मुकुन भुषालको अहिलेको अवस्था अहिले यस्तै छ । फरक यति हो, यो अवस्थाले उनी तनावमा भने छैनन् । बरु उनी यो समय इन्जोय गरिरहेका छन् । के गर्ने, कसो गर्ने कुनै अलमलमा छैनन् । न त दुबै फिल्म एउटै समय रिलिज हुन लागेकाले कुनै तनावै छ । 

मुकुनका ‘ऐंचो पैचो’ र ‘गणपति’ गरेर दुई फिल्म एकैसाथ १४ भदौबाट देशभर प्रदर्शनमा आउँदैछ । उनी अहिले एकसाथ दुबै फिल्मको प्रचार गरिरहेका छन् । एउटा कलाकारका लागि एउटै मितिमा दुई फिल्म जुध्नु पक्कै पनि सहज होइन ।

‘एकै समय दुई फिल्म रिलिज हुँदा हामी कलाकारलाई सारै सकस पर्छ । कुन फिल्मको के भन्ने कन्फ्युज हुन्छ’, उनले भने, ‘पालैपालो आउँदा हाम्रो काम पनि देखिन्थ्यो । प्रचारमा पनि सजिलो हुन्थ्यो ।’ एकैसाथ दुई फिल्म आउँदा दर्शकलाई कुन हेर्ने दोधार पर्नेसमेत उनको धारणा छ ।

‘हामी कलाकारका लागि आफ्नो फिल्म जुध्नु भन्दा फरक फरक समय आए राम्रो हुन्थ्यो । किनभने हामी दुई पटक मिडियामा छाउन र मिलाएर प्रचार गर्न पाउँथ्यौ’, उनले अगाडि थपे, ‘आमाबाबुका लागि सन्तान बराबर भनेझैँ हाम्रो लागि दुबै फिल्मको माया उस्तै हो ।’ 

फिल्म रिलिज गर्ने निर्माताको हातमा हुने भएकोले आफ्नो फिल्म जुध्दा पनि केही गर्न नसक्ने उनले विवशता सुनाए ।

‘निर्माताले ठुलो लगानी गरेर फिल्म बनाएको हुन्छ । रिलिज कुन समय गर्दा राम्रो हुन्छ । त्यो सबै बिचार गरेर मिति जुराएको हुन्छ’, उनले अगाडि ‘त्यसमा हामीले केही भन्न मिल्दैन ।’

अहिले सिंगल रिलिज हुँदा त फिल्मलाई लगानी उठाउन धौ धौ छ । एकै समय दुई फिल्म हुँदा ब्यवसायिक असर पर्छ । यसबाट निर्मातालाई घाटा त हुन्छ नै, कलाकारको पनि करियरमा धक्का पर्ने उनी सुनाउँछन् ।

फेरिन्छ चोपेन्द्रको परिचय

मुकुनको अहिलेसम्म ‘बुलबुल’ र ‘झिँगे दाउ’ दुइ फिल्म रिलिज भएका छन् । ‘गणपति’ र ‘ऐँचो पैचो’ एकै मितिमा रिलिज हुन लागेकाले उनी दुबै फिल्मलाई तेस्रो भन्छन् । 

उनले अभिनय भने ६ फिल्ममा गरिसकेका छन् । उनको अभिनय रहेको ‘बिच्छेद’ र ‘म राजेश हमाल’ रिलिज हुन बाँकी छ । उनी अहिले ७ औं फिल्म ‘उपहार’मा अभिनयको तयारी गर्दैछन् ।

‘बुलबुल’ मा उनले चोपेन्द्र नामक् पात्रको भूमिका निर्वाह गरेका थिए भने ‘झिँगे दाउमा’ उनको भूमिका परिवारको जेठो छोराको थियो । दुईमध्ये ‘बुलबुल’मा उनले निर्वाह गरेको चोलेन्द्र पात्रको छाप भने दर्शकमा राम्रो पर्यो । त्यो छाप अहिले रिलिज हुन लागेको दुईमध्ये ‘गणपति’ले मेट्ने उनी सुनाउँछन् ।

‘ऐंचो पैचो’मा मैले राजनीतिले पिल्सिएको युवाको प्रतिनिधित्व पात्रको भूमिका निर्वाह गरेको छु । त्यसले दर्शकको मन जित्न सक्छ’, उनले अगाडि भने, ‘‘गणपति’मा भने भगवान्को रुपमा जन्मिने मानिसको भूमिका छ ।’ 

भगवान्को रुपमा जन्मिएको मानिस ठुलो भएपछि उसलाई समाजमा आइपर्ने कठिनाई, समाजले हेर्ने दृष्टिकोणमा आकाश जमिनको फरक पर्छ । कुनैबेला पूजा गर्ने मानिसलाई पछि देख्दा थुक्छन् । त्यही चरित्र ‘गणपति’मा निर्वाह गरेको उनले खुलाए । हामी सबैले महसुस गरेको र अहिलेसम्म फिल्ममा नआएको बिषयमा ‘गणपति’ बनेको मुकुनले बताए ।

‘बुलबुल’ र ‘झिँगेदाउ’ले दर्शकमा बनाएको आफ्नो साख दुबै फिल्मले जोगाउने विश्वास मुकुनलाई छ । प्रचारप्रसार र कलाकारको हिसावले उनको ‘गणपति’ भन्दा ‘ऐंचो पैसो’ बलियो देखिन्छ । 

किनभने राम्रो प्रचारप्रसार भएको ‘ऐंचो पैचो’ मा स्वस्तिमा खड्का, बर्षा राउत, सुशील सिटौला जस्ता मल्टिस्टार कलाकारको उपस्थिति छ । 

‘गणपति’मा भने उनको अलावा मेनुका प्रधानको मुख्य अभिनय छ । ‘गणपति’ले ‘बुलबुल’बाट बनेको चोपेन्द्रको परिचय फर्नेमा उनी आशावादी छन् । 

एउटा कलाकारलाई फिल्म अभिनयका कारण ६–६ महिनामा आफ्नो परिचय फेरियोस् भन्ने चाहना हुन्छ । यसले, उसलाई काम गर्न अझै उर्जा पैदा गर्छ । 

मुकुनले पनि उही सोचका साथ ‘ऐंचो पैचो’मा अभिनय गरेका थिए । तर संयोग भनौ वा  के भनौ दुबै फिल्म एकसाथ आयो । एक वर्षपछि आफ्नो फिल्म आउन लागेकोले दुबै फिल्म राम्रो हुने आसमा छन् उनी ।

‘मैले ‘गणपति’मा पाएको भूमिका साँच्चिकै विशेष छ । यसबाट मेरो परिचय पनि बदलिनेछ’, मुकुन थप्छन्, ‘गणपति’मा स्टार कलाकार नभएको नाताले पनि मेरै चर्चा हुन्छ भन्ने छ ।’ 

यात्राको तय 

भनिन्छ, ‘एउटा कलाकारमा फरक चरित्रको भोक सधैँ रहन्छ । यदि   अभिनयको भोक मेटियो भने उसको काम गर्ने उर्जामा कमी आउँछ ।’ यही कुरामा विश्वास गर्छन् मुकुन । उनमा पनि जति फिल्म अभिनय गर्दै गयो, फरक फरक चरित्रको भोग जाग्दै आएको छ । कुन समय, कस्तो चरित्र रोज्ने भन्ने कुरो टिम र समयले निर्धारण गर्ने उनी बताउँछन् ।

त्यसो त कलाकारले फिल्ममा अभिनय गरेर मात्र हुँदैन । फिल्मको ब्यवसाय राम्रो हुनुपर्छ । त्यसले कलाकारको सफलता र असफलताको मूल्याङकनमा अर्थ राख्छ । ब्यवसायले कलाकारको लागि नयाँ फिल्मको अफरको अलावा उसको संघर्षको बाटो सहज बनाउँछ । मुकुन पनि सफल फिल्मले यात्रामा रोचकता थप्ने सुनाउँछन् ।

मुकुन आफ्नो फिल्मबाट ब्यवसाय र रिभ्यु दुबै आस गर्छन् । ‘रिभ्युबाट आफ्नो कमी कमजोरी थाहा हुन्छ । त्यसलाई सुधार गर्दै अगाडि बढ्न सजिलो हुन्छ’, उनले भने, ‘ब्यवसायले नयाँ काम र बजारमा चर्चा दिलाउँछ ।’ 

पहिलो र दोस्रो लगालग हिट फिल्म दिएका मुकुनलाई अहिले रिलिज हुन लागेको दुबै फिल्म हिट भए हुन्थ्यो भन्ने आस छ । रिभ्यु पनि उनले पोजेटिभ नै आस गरेका छन् ।

अब ग्याङ्गस्टर

मुकुन थोरै फिल्म अभिनय गर्ने कलाकार पनि हुन् । कतिपय कलाकार पैसाको पछि लागेका छन् । राम्रो रकम पाइयो भने फिल्मको कथा र पात्रमा खासै विचार गर्दैनन् । मुकन भने पहिले कथा र पात्र चित्त बुझाउँछन् । त्यसपछि मात्र पैसा हेर्छन् । त्यसैले त उनको दुई फिल्म रिलिज हुँदा दुबै हिट भए । 

प्रश्न उठ्छ, ‘थोरै फिल्म गर्दा चल्न पुग्छ त ?’ चलचित्रबाटै चल्नुपर्छ भन्ने छैन । म अन्य कामबाट चलिरहेको छु । त्यसैले गाह्रो छैन,’ उनले जवाफ दिए ।

फिल्म अभिनयको अलावा उनी कलेज पढाउँछन् त कहिले अभिनय कक्षा पनि चलाउँछन् । त्यसले कलाकारिताको आम्दानीबाट आफ्नो खर्च कटाएर केही घरमा पनि पठाउन सकेका छन् ।

‘आफ्नो जीवनशैली सिम्पल भएकोले खर्च धेरै नभएको सुनाउने उनी भन्छन्, ‘बुबाआमाले मेरो आम्दानीको आस त हुँदैन होला ।  तर, हामीले पठाएको सानो खर्चले पनि उहाँहरूलाई ठुलो खुसी दिन्छ भन्ने लाग्छ ।’

मुकुन बाबुआमाको ईच्छाविपरीत फिल्म क्षेत्रमा आएका हुन् । सानोमा फिल्म हेर्दा पनि ठुलै गल्ती गरेजस्तो कुटाइ खान्थे उनी । त्यसैले, सुरुको समय अभिभावकको साथ पाउने कुरै भएन उनले । अहिले भने कलाक्षेत्र पनि सम्मानित क्षेत्र हो भनेर अभिभावककले बुझेका कारण साथ पाउन थालेका छन् ।

अहिले उनले फिल्म खेलेको परिवार मात्र होइन, उनको जिल्लावासी अर्घाखाँचीका सबै खुसी छन् । किनभने त्यो जिल्लाबाट कलाकारितामा नाम कमाएको नन्दिता पछि उनी मात्रै हुन् । त्यसैले, उनको फिल्म आउँदा उनलाई नै थाहा नदिई जिल्लामा प्रचार क्याम्पियन चल्छ रे ।

मुकुनलाई अहिले ग्याङ्गस्टर जनरामा बन्ने फिल्म अभिनय गर्न मन लागेको छ । किनभने उनले पछिल्लो समय धेरै यस्तै जनराको विदेशी फिल्म हेरेका छन् । यो जनरामा फिल्म गर्न मन लागेको अर्काे कारण उनले यस्तो फिल्म अहिलेसम्म गरेकै छैनन् ।

कतिपयले मुकुनको एक्सन राम्रो होला, त्यही भएर यस्तो चाहना राख्यो पनि भन्न सक्छन् । तर उनको एक्सन भने राम्रो छैन । यस्तो जनरामा फिल्म आयो भने ६÷७ महिना समय लिएर एक्सन निखार्ने सोचमा छन् उनी ।