चीनको नक्साप्रति भारतको विरोध
बुधबार, १३ भदौ २०८०, १५ : ३२
नयाँ दिल्ली । चीनले जारी गरेको नयाँ नक्सामा भारतको अरुणाचल प्रदेश, अक्साई चीन र भारतका कयौँ क्षेत्र आफ्नो सीमामा देखाएपछि भारतले विरोध जनाएको छ । भारतीय विदेशमन्त्री एस जयशंकरले भारतले नक्साबारे चीनको ‘बेतुकको दाबी’ माथि कडा विरोध जनाएको बताएका हुन् ।
भारतको विदेश मन्त्रालयका प्रवक्ता अरिन्दम बागचीले पत्रकारको प्रश्नमा एक बयान पनि जारी गरेका छन् ।
बयानमा भनिएको छ, ‘चीनको तथाकथित २०२३ को ‘स्ट्यान्डर्ड म्याप’ मा भारतको क्षेत्रमाथि दाबी गरिएको छ, त्यसमाथि हामीले कूटनीतिक च्यानलमार्फत कडा विरोध जनाएका छौँ ।’
‘हामी यस्तो आधारहीन दाबीलाई खारेज गर्छौँ । चिनियाँ पक्षको तर्फबाट यस्तो कदमले सीमाको समस्यालाई सुल्झाउनुको साटो थप अल्झाउनेछ ।’