अभिनेत्री गौरीले गाइन् तीज गीत ‘धिन ताका नाका धिन’
काठमाडौँ । अभिनेत्री गौरी मल्ल गायिका पनि हुन् । बाल्यकालदेखि गायनमा सौखिन उनले वर्षौँ पहिले केही गीत गाएकी थिइन् । गायनमा भन्दा अभिनयमा बढी रुचाइएको कारण उनले अभिनयनै रोजिन् ।
गौरी फेरि गायनमा फर्किएकी छन् । स्वर शब्द र संगीतसमेत उनकै रहेको तीज गीत ‘धिन ताका नाका धिन’ मंगलबार एक कार्यक्रमकाबीच सार्वजनिक गरियो । गीत उनले १० वर्षपछि गायकी हुन् ।
गीतको भिडियो पनि सार्वजनिक भएको छ । भिडियोमा गौरीसँगै अभिनेत्री मिथिला शर्माको पनि अभिनय छ । गीत सार्वजनिक कार्यक्रममा केही उत्साहित र केही भावुक उनले गायिका रचना रिमालले गाउने तय भएको यो गीत उनले नभ्याएको कारण आफैले गाएको सुनाइन् ।
‘मलाई मनपर्ने गायिका रचना रिमाललाई यो गीत गाउन लगाउने कुरा थियो । तर, रचनाको व्यस्तताका कारण डिजे एलएक्स (एरेन्जर भाई) गीतअनुसार तपाईँले नै गाउँदा राम्रो हुन्छ भनेर आग्रह गरेपछि स्वर भरेकी हुँ’ गौरीले भनिन् ।
गौरीको बाल्यकालदेखि लेख्ने, पढ्ने र गाउने सोख थियो । अभिनय जीवन उनले बोनस मान्छिन् । अभिनयमा पारङ्गत मानिने गौरीले एक सय बढी नेपाली फिल्म अभिनय गरिसकेकी छन् । गीत सार्वजनिक कार्यक्रममा कलाकार तथा गायक मदनकृष्ण श्रेष्ठले नृत्य, गायन र अभिनय तीन वटै कलामा पोख्त रहेकाले गौरीलाई नाट्यश्वरीकी छोरी भन्दै तारिफ गरे ।