एसियाली खेलकुदमा नेपाली टेबलटेनिस खेलाडीको निराशाजनक प्रदर्शन
काठमाडौँ । चीनमा जारी १९औँ एसियाली खेलकुद प्रतियोगिताको पाँचौँ दिन बुधबार नेपालका टेबलटेनिस खेलाडीहरु प्रारम्भिक चरणबाटै बाहिरिएका छन् । पुरुष एकलतर्फ नेपालका दुई खेलाडी पहिलो चरणबाट बाहिरिए ।
पुरुष एकलतर्फको ६४ खेलाडीबीचको भिडन्तमा नेपालका रुविन महर्जन पराजित भए । माल्दिभ्सका खेलाडी मोहम्मद सफान ईस्माइलले रुविनलाई ४—१ सेटमा हराएका हुन् । उक्त भिडन्तमा माल्दिभ्सका खेलाडी ११—६, ३—११, ११—८, ११—६ र ११—८ अंकले विजयी भए ।
यसैगरी पुरुष एकलतर्फको अर्को खेलमा नेपालका संयोग कपाली पनि पराजित भए । यमनका खेलाडी अहमद ओमर अलीले संयोगलाई ४—० सेटमा पराजित गरेका हुन् । उक्त खेलमा यमनका खेलाडी ११—८, ११—७, ११—९ र ११—६ अंकले विजयी भए ।
यसैगरी पुरुष डबल्सतर्फको खेलमा नेपालका संयोग कपाली र रुविन महर्जनको जोडी पनि पहिलो चरणमै पराजित भयो । पाकिस्तानका खेलाडी मोहम्मद शाह खान र फैजन जाहुरको जोडीले नेपालका संयोग र रुविनाको जोडीलाई ११—८, ११—४ र ११—७ अंकले हरायो ।