सुर्खेत । नेकपा एमालेले कर्णाली प्रदेश अधिवेशनमा सर्वसम्मत तरिकाले नेतृत्व चयनको प्रयास गरे पनि सफल हुन नसकेपछि मतदानबाट नेतृत्व छनोटको प्रक्रिया अघि बढेको छ ।

मतदानबाटै नेतृत्व चयन गर्ने निधो भएसँगै अहिले उम्मेदवारी दर्ता भइरहेको छ । निर्वाचन अधिकृत मातृका यादवले रातोपाटीलाई दिएको जानकारी अनुसार अहिलेसम्म अध्यक्षका लागि पाँच जनाको उम्मेदवारी दर्ता भएको छ ।

यामलाल कँडेलको टिमबाट अध्यक्षमा सल्यानका गुलावजंग शाह, गोरख बोगटीको टिमबाट कालिकोटका मिनबहादुर शाहीले उम्मेदवारी दर्ता गराएका छन् ।

यस्तै प्रदेशसभाका पूर्व सभामुख राजबहादुर शाही, प्रेमबहादुर सिंह र प्रकाश रोकायाले पनि अध्यक्षमा उम्मेदवारी दर्ता गराएका छन् । उम्मेदवारी दर्ता गर्ने प्रक्रिया अझै जारी छ ।

उम्मेदवारी दर्ता पश्चात् केही उम्मेदवारले भोट माग्न सुरु गरिसकेका छन् भने कोही कार्यक्रम स्थलमै देखिएका छैनन् ।

उम्मेदवार गुलावजंग शाहले टिम बनाएर भोट माग्न सुरु गरिसकेका छन् ।