देउचुली र बार्तलीमा
म देउचुली र तिमी बार्तलीमा
किन बस्ने ?
आउ यता सँगै गीत गाऊँ
चिप्लेटी खेल्ने रहर छ तिमीसँग
तिम्रो कोमल शरिरमा
समयको नास्पतीको बोट देख्न मन छ
सङ्गै बसेर नखाएको पनि निकै भयो
यो मन को चाह ।
तिनिक्क समयलाई तानेर
तन्नालाई च्यात्न हैन
सिउन मन छ प्रेमको धागोले
समयको यौवनका बिहानीमा
जोवनका ईच्छाहरू फुलाएर
लुकामारी खेल्न मन छ
पाती र ऐशेलुको घारीमा
लुकामारी नखेलेको पनि धैरै भयो ।
लुकामारी लुकामारी नै हो
समयको कुनामा बसेर
कदमको बोट सँगैको कुवाको पानी
एउटै अञ्जुलीमा पिउन मन छ
बाबियोको झाडी पन्छाउँदै
पहाड नचढेको पनि युगौं भयो
तिमी उकाली र म ओरालीमा हुँदा
तिमी तल र म माथि भएर उकालो नचढेको
थाक्न मन छैन कत्ति पनि
थकान मारेर टुप्पोमा चढ्न मन छ
आँखा चिम्लिएर
प्रकृतिलाई नियाल्न मन छ सुटुक्क
लिङ्गे पिङमा तिमीलाई बसाएर
मच्चाउन मन छ
रात तातिएर
बिहान सेलाउन थालेको समय देख्न मन छ ।