अर्जेन्टिनी स्ट्राइकर मार्टिनेज नायक बनेको खेलमा इन्टरको सजिलो जित
काठमाडौँ । इटालियन सिरिए फुटबलको आफ्नो पछिल्लो खेलमा इन्टर मिलानले सजिलो जित हात पारेको छ । इन्टर मिलानले आइतबार सम्पन्न खेलमा सलेरनिटानालाई ४—० गोलले पराजित गर्यो । इन्टर मिलानको जितमा लाउटारो मार्टिनेज नायक बने ।
पहिलो हाफ गोलरहित बराबरीमा सकिएको उक्त खेलमा इन्टर मिलानले दोस्रो हाफमा लगातार चार गोल गरेको थियो । निर्धारित समयको ६२औँ मिनेटमा मार्टिनेजले इन्टर मिलानका लागि पहिलो गोल गरेका थिए ।
खेलको ७७औँ मिनेटमा उनले टोलीको अग्रता दोब्बर बनाएका थिए । ८५औँ मिनेटमा मार्टिनेजले टोलीका लागि तेस्रो गोल थपेका थिए । निर्धारित समयको खेल सकिनुभन्दा एक मिनेटअघि उनले इन्टर मिलानका लागि चौथो गोल गरेका थिए ।
२६ वर्षीय अर्जेन्टिनी स्ट्राइकर मार्टिनेज सन् २०१८ देखि इन्टर मिलानमा आबद्ध छन् । जारी सिजनको लिगमा हालसम्म सात खेल खेलेको इन्टर मिलान १८ अंकसहित तालिकाको पहिलो स्थानमा छ । ६ खेलमा जित हात पारेको इन्टर मिलानले एक खेलमा हार भोगेको छ । सात खेल खेलेको सलेरनिटाना भने तीन अंकसहित तालिकाको १९औँ स्थानमा आसिन छ ।