मेस्सीबिनाको मियामी पराजित
बिहीबार, १८ असोज २०८०, ०८ : ३६
सिकागो । स्टार खेलाडी लियोनेल मेस्सी बिना मैदानमा उत्रेको इन्टर मियामी मेजर लिग सकरमा सिकागोसँग पराजित भएको छ । बिहीबारको खेलमा मियामी १–४ गोलले पराजित भएको हो ।
सबै गोल खेलको दोस्रो हाफमा भएको थियो । जर्डान साकिरीले खेलको ४९ औँ मिनेटमा सिकागोलाई अग्रता दिलाएका थिए । तर, ४ मिनेटपछि नै जोसेफ मार्टिनेजले पेनाल्टीमार्फत मियामीका लागि बराबरी गोल फर्काए ।
त्यसपछि भने सिकागोले गोलको वर्षा गरेको थियो । मात्र ३ मिनेटको अन्तरमा मारेन हेली सेलासेले दुई गोल गर्दै सिकागोलाई अग्रता दिलाए । साकिरीले ७३ औँ मिनेटमा व्यक्तिगत दोस्रो गोल गर्दै टोलीको जीत सुनिश्चित गरे ।
पराजयपछि मियामी ३१ खेलबाट ३३ अंक बटुल्दै लिगको १४ औँ स्थानमा सीमित रहेको छ । सिकागो भने ३२ खेलबाट ४० अंकसहित आठौँ स्थानमा छ ।