अमेरिकाका मधेसीहरुले झिझिया कार्यक्रमकाे आयोजना गर्ने
काठमाडौँ । मधेसी एसोसिएशन इन अमेरिका (एमए) ले अमेरिकामा झिझिया कार्यक्रमको आयोजना गर्ने भएको छ ।
अमेरिकाको न्यूजर्सी राज्यमा पेनसलभनिया, न्यूयोर्कलगाएतका मधेसी समुदायले मिलेर आज झिझिया कार्यक्रम गर्न लागेको कार्यक्रमका संयोजक सुवास साहले बताए ।
उनका अनुसार दसैँलाई लक्षित गरेर तराई मधेसका सबैभन्दा चर्चित नृत्य झिझिया कार्यक्रमको आयोजना गर्न लागिएको हो । अमेरिकामा यो कार्यक्रम पहिलो पटक भएको उनले दाबी गरे ।
एमएका वरिष्ठ उपाध्यक्ष मनोज सिंहका अनुसार कार्यक्रममा सबै राज्यबाट मधेशीहरुको सहभागी रहने छन् । कार्यक्रमबाट अमेरिकामा रहेका मधेसी समुदाय निकै उत्साहित भएको उनले बताए ।
एमएका प्रवक्ता सुभाषकुमार बैठाका अनुसार कार्यक्रम पहिलो पटक गर्न लागेकाले चुनौती भएपनि सबैको साथ सहयोग प्राप्त भएपछि सम्भव भएको हो ।
अमेरिकामा रहे पनि आफ्नो देशको भाषा, संस्कृति र परम्परालाई जोगाई राख्न झिझिया लगायत अन्य कार्यक्रमहरुको आयोजना गरिएको उनले बताए ।
त्यसैगरी अध्यक्ष संगित रौनियारले यस्ता झिझिया, समा–चकेवा, दिपावली, छठ लगायत मधेसका पर्वहरू अब सामूहिक रूपमा मनाउने बताइन् ।