हैदराबाद । न्यूजिल्याण्डले विश्वकपमा लगातार दोस्रो जित हात पारेको छ । किवी टोलीले नेदरल्याण्ड्सलाई ९९ रनले पराजित गरेको छ । यो जितपछि टोली ४ अंकसहित अंक तालिकाको शीर्ष स्थानमा छ ।

हैदराबादको राजीव गान्धी अन्तर्राष्ट्रिय क्रिकेट स्टेडियममा टस हारेर पहिले ब्याटिङ गरेको न्यूजिल्याण्डले निर्धारित ५० ओभरमा ७ विकेट गुमाएर ३ सय २२ रन बनाएको थियो ।  ओपनर विल योङले ७० रन, रचिन रविन्द्रले ५१ रन र टम लाथमले ५३ रनमा अर्धशतक बनाए भने डेरिल मिचेलले ४८ रन बनाए । नेदरल्याण्ड्सका लागि  आर्यन दत्त, पल भान मिकेरेन र रोएलफ भान डर मर्वेले समान २–२ विकेट लिए ।

जवाफी इनिङ्समा नेदरल्याण्ड्सको टोली ४६.३ ओभरमा २ सय २३ रनमा अलआउट भयो । नेदरल्यान्ड्स विरुद्ध बायाँ हाते स्पिनर मिचेल स्यान्टनरले ५९ रन दिएर ५ विकेट लिए । 

उनी विश्वकपमा ५ विकेट लिने न्यूजिल्याण्डका   पहिलो स्पिनर बनेका छन् । यसअघि ड्यानियल भेटोरीले सन् २००७ मा आयरल्याण्ड र २०१५ मा अफगानिस्तानविरुद्ध ४–४ विकेट लिएका थिए । फास्ट बलर मध्ये टिम साउथीको नाममा इंग्ल्याण्ड विरुद्ध ३३ रनमा ७ विकेट लिने कीर्तिमान छ ।

स्यान्टनरले रायन क्लाइन (८ रन), रोलोफ भान डर मर्वे (एक रन), कप्तान स्कट एडवर्ड्स (३० रन), कोलिन एकरम्यान (६९ रन), म्याक्स ओडाउड (१६ रन) को विकेट लिए।