काठमाडौँ । आईसीसी एकदिवसीय विश्वकपको मंगलबार खेलिएको खेलमा साबिक विजेता इङ्ल्यान्डले बंगलादेशलाई जितका लागि तीन सय ६५ रनको लक्ष्य दिएको छ । धर्मशालास्थित हिमाञ्चल प्रदेश क्रिकेट एसोसिएसनको स्टेडियममा टस हारी पहिले ब्याटिङको निम्तो पाएको इङ्ल्यान्डले निर्धारित ओभरमा नौ विकेट गुमाएर तीन सय ६४ रन बनायो । 

इङ्ल्यान्डलाई ओपनर ब्याट्सम्यानद्वय डेविड मलान र जोनी ब्रेस्टोले उत्कृष्ट सुरुआत गराएका थिए । यी दुबै ब्याट्सम्यानले ओपनिङ विकेटका लागि एक सय १५ रनको साझेदारी गरे । मलानले टोलीका लागि एक सय ४० रनको योगदान गरे ।

बंगलादेशविरुद्ध आक्रामक रुपमा प्रस्तुत भएका मलानले केवल एक सय सात बलको सामना गरी पाँच छक्का र १६ वटा चौका हिर्काएका थिए । अर्का ओपनर ब्रेस्टोले पनि अर्धसतक बनाए । उनले पेभेलियन फर्किनुअघि टोलीको खातामा ५२ रन थपे । उनले ५९ बलमा आठ चौका पनि हिर्काए ।

तेस्रो नम्बरका ब्याट्सम्यान जोए रुटले पनि उत्कृष्ट ब्याटिङ गर्दै ८२ रन बनाए । उनले केवल ६८ बलको सामना गरी एक छक्का र आठवटा चौका पनि हिर्काएका थिए । इङ्ल्यान्डका माथिल्लो क्रमका ब्याट्सम्यानसामु बंगलादेशका बलरहरु निरिह सावित भए । 

कप्तान जस बट्लर भने २० रनभन्दा अगाडि बढ्न सकेनन् । उनले १० बलमा एक छक्का र एक चौका हिर्काए । पाँचौँ नम्बरमा क्रिज समाल्न आएका ह्यारी ब्रुक पनि २० रनभन्दा अगाडि बढ्न सकेनन् । उनले १५ बलमा तीन चौका प्रहार गरे । 

इङ्ल्यान्डका लागि साम करनले पनि ११ रन जोडे । क्रिस वोक्सले १४ रन बनाए । आदिल रसिदले पनि ११ रन बटुले । बंगलादेशी टोलीका बलर मेहदी हसनले चार विकेट लिए । सोरिफुल ईस्लामले पनि तीन विकेट लिए । सकिब अह हसन र तास्किन अहमदले एक—एक विकेट हात पारे । 

जारी विश्वकपको आफ्नो पहिलो खेलमा इङ्ल्यान्ड पराजित भएको थियो । न्युजिल्यान्डले इङ्ल्यान्डलाई नौ विकेटले हराएको थियो । बंगलादेश भने आफ्नो पहिलो खेलमा विजयी भएको थियो । बंगलादेशले अफगानिस्तानलाई ६ विकेटले हराएको थियो ।