बर्लिन । प्यालेस्टिनी लडाकु समूह हमासले इजरायलमाथि गरेको अकस्मात आक्रमणका क्रममा बन्धक बनाइएका व्यक्तिहरूको रिहाईका लागि मध्यस्थता गर्न जर्मनीले कतारलाई आग्रह गरेको छ ।

विदेशमन्त्री एनालेना बेयरबोकले सांसदहरूसँगको बैठकमा भनिन्,'कतारलगायत यस क्षेत्रका विभिन्न देशहरूले महत्त्वपूर्ण भूमिका खेल्नुपर्छ, किनकि उनीहरूसँग हामीसँग नभएका सम्पर्क उपायहरू छन् ।' 

कतारका अमीर शेख तमिम बिन हमाद अल थानी बिहीबार बर्लिनको चान्सलर ओलाफ स्कोल्जसँग वार्ताका लागि बर्लिन जानुभन्दा एक दिनअघि बेयरबोकको यो टिप्पणी आएको हो ।

एक दशकभन्दा बढी समयदेखि हमासको राजनीतिक कार्यालय राख्न दिँदै आएको कतारले गाजालाई करोडौं डलरको आर्थिक सहायता उपलब्ध गराएको छ । यसअघि पनि कतारले इजरायल र लडाकु समूहबीच सम्झौता गर्न मध्यस्थता गरेको थियो ।

मङ्गलबार कतारी विदेश मन्त्रालयका प्रवक्ता माजेद बिन मोहम्मद अल अन्सारीले इजरायल र हमासबीच सम्भावित वन्दी आदानप्रदानका लागि वार्ता थाल्न हतार हुने बताए । 

जर्मनीका अर्थमन्त्री तथा उपकुलपति रोबर्ट हेबेकले बुधबार पत्रकारहरुसँग कुरा गर्दै खाडी मुलुक कतार हमास ‘हमासको वित्तपोषणकर्ता’ पनि भएको बताए । 

“त्यसैले कतारसँग ‘जर्मनी र इजरायलसँग नभएको’ सम्पर्क सुत्र पनि हुनसक्छ,” हेबेकले भने ।

उनले भने, “कतारले हमासमाथि आफ्नो प्रभाव जमाउनु महत्त्वपूर्ण हुनेछ ताकि यो फेरि नदोहोरियोस् वा यसको प्रायश्चित गर्न सकियोस् ।”

हेबेकले आफ्नो ग्यास आपूर्तिका लागि कतारमाथिको निर्भरताका कारण जर्मनीले सम्झौता गरेको भन्ने आरोपलाई अस्वीकार गरे ।

मस्कोले युक्रेनमाथि गरेको आक्रमणपछि रोकिएको रुसी ग्यास आपूर्ति प्रतिस्थापनका लागि जर्मनीले इमिरेट्सलाई प्रयोग गरेको छ ।

“कतार अहिले जर्मनीको सबैभन्दा ठूलो ऊर्जा आपूर्तिकर्ता होइन,” हेबेकले भने, “कतारसँग आपूर्ति सम्झौता छ तर यसलाई रुसी राष्ट्रपति भ्लादिमिर पुटिनसँग हामीले गरेको सम्झौतासँग तुलना गर्न सकिँदैन ।”- (रासस/एएफपी)