विवादबिच एनआरएनएको नयाँ नेतृत्वले सम्हाल्यो कार्यभार
बिहीबार, ०९ कात्तिक २०८०, २० : १५
काठमाडौँ । गैरआवासीय नेपाली सङ्घ (एनआरएनए) को नयाँ नेतृत्वले आजदेखि कार्यभार सम्हालेको छ । कार्यभार सम्हालेपछि नवनिर्वाचित अध्यक्ष डा बद्री केसीको अध्यक्षतामा पदाधिकारीको पहिलो बैठक भएको थियो । यद्यपि बैठकका निर्णय सार्वजनिक गरिएको छैन ।
त्यसअघि एनआरएनए अन्तर्राष्ट्रिय समन्वय परिषद्को निर्वाचन समितिले नयाँ नेतृत्वलाई निर्वाचित भएको प्रमाणपत्र प्रदान गरेर पद तथा गोपनीयताको शपथ गराएको थियो । सूचना प्रविधिसम्बन्धी अडिट गर्ने अन्तर्राष्ट्रिय संस्थाबाट निर्वाचन विवाद अडिट गराइ प्राप्त हुने प्रतिवेदनलाई आफूहरुले स्वीकार गर्ने नवनिर्वाचित अध्यक्ष केसीले बताए ।
यता निर्वाचन कार्यक्रम स्थगित भएको सर्कूलर जारी हुँदा पनि शपथ लिएको भन्दै असन्तुष्ट समूहले छुट्टै पत्रकार सम्मेलन गरेर छुट्टै कमिटी घोषणा गर्ने संकेत गरेको छ ।