बिग बोस विजेता एल्विश यादवलाई फिरौती माग्ने पक्राउ
शुक्रबार, १५ मङ्सिर २०८०, १४ : ३७
मुम्बई । गुरुग्राम प्रहरीले बिग बोस ओटीटी सिजन २ का विजेता एल्विश यादवलाई जबरजस्ती रकम माग गर्ने संदिग्धलाई पक्राउ गरेको छ।
गुरुग्राम एसीपी अपराध शाखाका वरुण दहियाले भने, “गुजरात पुलिसको सहयोगमा गुरुग्राम पुलिसले वडनगर निवासी शाकिर मकरानीलाई पक्राउ गरेको छ। उनी एल्विश यादवबाट प्रभावित थिए र पैसा कमाउनका लागि फिरौती माग्ने योजना बनाएका थिए।’
गुरुग्रामको सेक्टर ५३ प्रहरी चौकीमा दिएको उजुरीमा एल्विश यादवले अक्टोबर १७ मा ह्वाट्सएप म्यासेजमार्फत आफूसँग १ करोड रुपैयाँ फिरौती मागेको बताएका थिए । यस विषयमा यादवको तर्फबाट कुनै प्रतिक्रिया आएको छैन ।