काठमाडौँ । जारी विश्वकपमा उत्कृष्ट प्रदर्शन गर्दै आएका अस्ट्रेलियन टोलीका अलराउन्डर मिचेल मार्स व्यक्तिगत कारणले स्वदेश फर्किएका छन् । उनी अस्ट्रेलियाको आगामी खेलमा टोलीमा सहभागी हुने छैनन् । 

जारी विश्वकपमा अस्ट्रेलियाले आगामी खेल इङ्ल्यान्डसँग खेल्नेछ । अस्ट्रेलिया र इङ्ल्यान्डबिचको खेल शनिबार अहमादाबादस्थित नरेन्द्र मोदी स्टेडियममा खेलिने छ । क्रिकेट अस्ट्रेलियाले पनि ३२ वर्षीय मार्स व्यक्तिगत कारण घर फर्किएको समाचारको पुष्टि गरेको छ । 

अस्ट्रेलियन टोलीका अर्का प्रभावशाली खेलाडी ग्लेन म्याक्सवेल पनि इङ्ल्यान्डविरुद्धको खेलमा उपस्थित हुने छैनन् । उनी सोमबार गल्फ खेल्ने क्रममा घाइते भएका थिए । ‘मिचेल मार्स व्यक्तिगत कारणले घर फर्किएका छन् । उनी छिट्टै पुनः टोलीमा सहभागी हुन भारत फर्कने आशा गरेका छौँ,’ क्रिकेट अस्ट्रेलियाले भनेको छ । 

जारी विश्वकपको श्रीलंकाविरुद्धको खेलमा उनले ५२ रन बनाएका थिए । पाकिस्तानविरुद्धको खेलमा पनि उनले टोलीका लागि एक सय २१ रनको योगदान गरेका थिए । नेदरल्यान्ड्सविरुद्धको खेलमा उनले दुई विकेट लिएका थिए । जारी विश्वकप तालिकामा हालसम्म ६ खेल खेलेको अस्ट्रेलिया आठ अंकसहित तेस्रो स्थानमा छ ।