सेमिफाइनलमा पुग्ने पहिलो टिम बन्यो भारत
बिहीबार, २१ मङ्सिर २०८०, २१ : २५
काठमाडौँ । एक दिवसीय विश्वकप प्रतियोगिता अन्तर्गत आयोजक राष्ट्र भारत सेमिफाइनलमा पुग्ने पहिलो टिम भएको छ ।
बिहीबार श्रीलंकालाई पराजित गरेसँगै भारतले सेमिफाइनलमा आफ्नो स्थान सुरक्षित गरेको छ । जारी प्रतियोगितामा भारतले लिग चरणका सात खेल खेल्दै सात वटैमा जित हासिल गरेको छ । अंक तालिकाको शीर्ष स्थानमा रहेको भारतले लिग चरणमा अब दक्षिण अफ्रिका र नेदरल्याण्ड्ससँग खेल्न बाँकी छ ।
लिग चरणका आफ्ना दुई खेल बाँकी रहँदै भारतले सेमिफाइनलमा स्थान सुरक्षित गरेको हो । बंगलादेश सेमिफाइनलको रेसबाट पूर्ण रुपमा बाहिरिइसकेको छ ।
साविक विजेता इङ्ग्ल्याण्ड अंकतालिकाको पुछारमा रहे पनि ६ खेलमा एक जित हासिल गरेको यो टिम गणितीय रुपमा सेमिफाइनल पुग्ने झिनो आशामा छ ।