एक्सक्लुसिभ स्टोरी
युनिकोड
मिति रूपान्तरण
भूकम्प प्रभावित बस्तीमा सांसद शर्मासहितको टोली, तस्बिरमा हेर्नुहोस्
रुकुम पश्चिम । शुक्रबार गएको भूकम्पका कारण आठबीसकोट नगरपालिका वडा नम्बर १३ का बस्तीहरू नराम्ररी प्रभावित भएका छन् । कतिपय घरहरु भूकम्पले ढलेका छन् भने नभत्किएका घरहरु पनि चर्किएर बस्नै नहुने भएका छन् ।
नेकपा माओवादी केन्द्रका नेता तथा त्यस क्षेत्रबाट निर्वाचित प्रतिनिधिसभा सदस्य जनार्दन शर्माका अनुसार सोही नगरपालिकाको लटा हम्फा गाउँका कतिपय घरहरु भत्किएका छैनन् । तर, ढुंगामाटोले बनेका उक्त घरहरु बस्न नहुने भएका छन् । स–साना भूकम्पले पनि घर भत्किने खतरा रहेको भन्दै उनले सबै सर्वसाधारण खुला आकाशमा रहन बाध्य भएको बताए ।
मंगलबार शर्मासहित विभिन्न राजनीति दलका टोलीले प्रभावित क्षेत्रमा पुगेर जनतासँग भेट गरेको छ । भेटका क्रममा स्थानीयले आफूहरुको भरोसा जनप्रतिनिधि नै रहेको भन्दै राहत र पुनर्स्थापनामा पहल गर्न आग्रह गरेका छन् । सो क्रममा शर्माले आफूहरु जनतासँगै रहेको भन्दै त्यसका लागि पहल गर्ने प्रतिबद्धता जनाए ।
शर्माका अनुसार सो क्षेत्रमा राहत सामगीहरु केही वितरण भएको छ भने बाँकी वितरणको प्रक्रियामा रहेका छन् ।
भूकम्पलगत्तै नेता शर्माले निरन्तर प्रभावित क्षेत्रमा खट्दै राहत र पुनर्स्थापनाका लागि पहलकदमी लिँदै आएका छन् । भूकम्पबाट जाजरकोट र रुकुम पश्चिममा व्यापक मानवीय र भौतिक क्षति भएको छ ।
प्रतिक्रिया