गण्डकी कांग्रेसको पहिलो सम्मेलन पुस ३ र ४ गते
पोखरा । नेपाली कांग्रेस गण्डकी प्रदेशको पहिलो सम्मेलन पुस ३ र ४ गते पोखरामा हुने भएको छ । बिहीवार बसेको कार्यसम्पादन समितिको बैठकले पहिलो सम्मेलनको निर्णय गरेको हो ।
सम्मेलनलाई सम्पन्न गर्न विभिन्न उपसमिति पनि गठन भएको छ । महामन्त्री किरणबाबुु श्रेष्ठको संयोजकत्वमा संगठन प्रतिवेदन तयार समिति, महामन्त्री विष्णुप्रसाद लामिछानेको संयोजकत्वमा राजनीतिक प्रतिवेदन तयार समिति, कोषाध्यक्ष वसन्तकुमार श्रेष्ठको संयोजकत्वमा आर्थिक परिचालन समिति, सहमहामन्त्री कोपिला रानाभाटको संयोजकत्वमा स्वागत तथा सत्कार समिति गठन भएको छ ।
प्रदेश सम्मेलन अघि मंसिर मसान्तसम्म सबै जिल्लाको भेला सम्पन्न गरी प्रतिवेदन पठाउन निर्देशन दिइएको प्रवक्ता माधवप्रसाद बास्तोलाले जानकारी दिए । यस्तै, सदस्य सीता गुरुङको संयोजकत्वमा मञ्च व्यवस्थापन समिति र सदस्य अजित क्षेत्रीको संयोजकत्वमा आवास व्यवस्थापन समिति गठन गरिएको छ । बैठकमा सभापति शुक्रराज शर्माले विभिन्न विभागमा मनोनयन गरिएकोबारे जानकारी गराएका थिए ।