विराटनगर । शौचालय निर्माणका लागि कोशी प्रदेश सरकारले छुट्याएको ५ करोड बजेट कटौती गरिने भएको छ । उक्त रकम पर्यटन प्रवर्द्धनका लागि इलामकै सोही क्षेत्रमा लगानी गर्ने कोशी प्रदेश वन, पर्यटन तथा वातावरण मन्त्री गणेश उप्रेती ‘सुशील’ले जनाएका छन् ।

मन्त्रालयको जिम्मेवारी पाएलगत्तै आइतबार पद बहाली गर्दै मन्त्री उप्रेतीले शौचालय बनाउन छुट्याएको ५ करोड रकममध्ये ५० लाख सोही प्रयोजनमा खर्च गर्ने र बाँकी रहेको पैसा इलामकै पर्यटकीय क्षेत्रमा लगानी गर्ने बताएका हुन् ।

यो पनि

कोशी प्रदेश : एउटै शौचालय बनाउन पाँच करोड बजेट

प्रदेशका मन्त्री शम्शेर राईको निर्वाचन क्षेत्रमा पर्ने श्रीअन्तुमा शौचालय निर्माण गर्ने भन्दै प्रदेशको बजेटसम्बन्धी रातो किताबमा ५ करोड रुपैयाँ छुट्याइएको थियो । उक्त विषयमा सरकारको चर्को आलोचना हुँदै आएको छ ।

‘मुख्यमन्त्रीसँगको छलफलमा पनि सो रकमलाई कटौती गर्ने र पर्यटन प्रवर्द्धनमा लगाउने कुरा भएको छ । अब त्यही अनुसार प्रदेश सरकार अगाडि बढ्छ,’ मन्त्री उप्रेतीले भने ।

यसैबिच मन्त्री उप्रेतीले पूर्वमुख्यमन्त्री हिक्मतकुमार कार्कीको निर्वाचन क्षेत्रमा पर्ने गौरादहको पोखरी निर्माणका लागि भएको खर्चको पनि छानबिन गरिने बताए । उक्त पोखरी निर्माणका लागि भन्दै यस वर्ष पुनः ४ करोड रुपैयाँ छुट्याइएको छ । सो पोखरी निर्माणका नाममा लामो समयदेखि बजेट छुट्याइए पनि काम नभएको भन्दै आलोचना भइरहेको छ ।

‘पोखरी निर्माणको विषयमा पनि विभिन्न कुरा उठेको छ । कति बजेट छुट्याइएको थियो । कति बजेट खर्च भयो र सही ढङ्गले काम भयो भएन भन्ने विषयमा मुख्यमन्त्रीसँग आवश्यक सल्लाह गरेर छानबिन गर्ने गरी अगाडि बढ्छु,’ उप्रेतीले भने ।

पूर्वमुख्यमन्त्री कार्कीको घरछेउमा रहेको उक्त पोखरीमा केही वर्ष यता बर्सेनि करोडभन्दा बढी बजेट विनियोजन भइरहेको छ । सो पोखरीमा प्रदेश सरकार गठन हुनुभन्दा अगाडि नगरपालिका, स्थानीय विकास मन्त्रालय र पर्यटन मन्त्रालयबाट पनि करोडौँ बजेट लगानी भएको जनाइएको छ ।

यसैबिच मन्त्री उप्रेतीले आफ्नो कार्यभार सम्हाल्दै प्रदेशको वन ऐनलाई तत्काल संशोधन गरेर लागू गर्ने निर्णय गरेका छन् । गत कार्तिक १७ गते मन्त्री नियुक्त भए पनि उनको विभाग आइतबारमात्र तोकिएको हो ।