‘पोई पर्यो काले’ सेन्सर पास
काठमाडौं – फिल्म ‘पोई प¥यो काले’ सेन्सर पास भएको छ । आइतबार चलचित्र सेन्सर बोर्डले फिल्मलाई सबैले हेर्न मिल्ने ‘युनिभर्सल सर्टिफिकेट’ दिँदै सार्वजनिक प्रदर्शनमा लागि खुल्ला गरेको हो । फिल्म शिशिर राणाले निर्देशन गरेका हुन् ।
कुनै दृश्य काँटछाँट नगरी सेन्सर बोर्डले फिल्म पास गरेको निर्देशक राणाले जानकारी दिए । ‘हामीले जे सोचेका थियौँ, सेन्सरले त्यही सर्टिफिकेट दिएको छ,’ उनले भने, ‘हाम्रो फिल्म अब सबै दर्शकले हेर्न पाउने छन् ।’
सेन्सरका ब्यक्तिहरुले फिल्मको बिषयबस्तु मन परेको बताउँदै सफलताका लागि शुभकामना समेत दिएको राणाको भनाइ छ ।
मानिसको बाहिरी रुप हेरेर त्यो राम्रो–नराम्रो भनिने गलत सोच हाम्रो समाजमा छ । त्यही सोचलाई मुख्य बिषयबस्तु बनाइएको फिल्ममा पूजा शर्मा र आकाश श्रेष्ठ, सौगात मल्ल, श्रृष्टि श्रेष्ठ, सोहित मानन्धर, राजाराम पौडेल लगायतको मुख्य भूमिका छ ।
रेड बर्ड प्रोडक्शनको ब्यानरमा निर्माण भएको फिल्म तिहारको छेको पारेर आगामी शुक्रबार अर्थात कात्तिक ८ गतेबाट देशभर एकसाथ प्रदर्शनमा आउँदैछ ।
किरण नेपाली प्रस्तुतकर्ता, दिपक मनाङ्गे र सरोज नेपाली निर्माता रहेको फिल्ममा अमलादेवी राई कार्यकारी निर्माताको रुपमा छिन् ।
फिल्ममा शिव ढकालको छायांकन, अर्जुन पोखरेल र पुरुषोत्तम न्यौपानेको संगीत, रामजी लामिछाने र कमल राईको कोरियोग्राफी छ ।