सनराइज बैंकले तीन अर्बको ऋणपत्र निष्काशन गर्दै, उच्च प्रतिफल पाइने (भिडियोसहित)
काठमाडौँ । सनराइज बैंकले तीन अर्बको ऋणपत्र निष्काशन गर्ने भएको छ । बुधबारदेखि जारी हुने यस ऋणपत्रको ब्याजदर १०.२५ प्रतिशत रहेको छ । यसअघि बैंकले १ अर्ब रुपैयाँ बराबरको ऋणपत्र जारी गरिसकेको छ ।
ऋणपत्र निरन्तर उच्च प्रतिफल लिइरहने ग्राहकका लागि अति उपयोगी हुने बैंकका सिइओ जनक शर्मा पौड्यालले मंगलबार पत्रकार सम्मेलन गरी जानकारी दिए ।
बैंकको यो ऋणपत्र सात वर्षको हुनेछ । ६–६ महिनामा ब्याज भुक्तानी हुनेछ । बैंकले ६० प्रतिशत संस्थागत र ४० प्रतिशत सर्वसाधारणलाई बिक्री खुला गर्ने जनाएको छ । यस ऋणपत्रका लागि कात्तिक २४ गतेसम्म आवेदन दिन सकिनेछ भने सो समयसम्म पर्याप्त आवेदन नपरे मंसिर १९ गतेसम्म बिक्री खुला हुनेछ । यस ऋणपत्रको निस्काशन तथा बिक्री प्रबन्धक सिद्धार्थ क्यापिटललाई तोकिएको छ ।
ऋणपत्रका लागि बैंकका सबै शाखा कार्यालयबाट आवेदन दिन सकिन्छ । यसबाहेक आस्वा प्रणालीमार्फत जुनसुकै बैंकबाट पनि आवेदन दिन सकिन्छ । ऋणपत्र खरीदका लागि बैंक खाता अनिवार्य गरिएको छ ।
बैंकले चालु बर्षको पहिलो त्रैमासमा (साउनदेखि असोज मसान्तसम्म) ८० अर्ब ३० करोड निक्षेप संकलन गरेको छ भने ७१ अर्ब १६ करोड ऋण लगानी गरेको छ ।