भीमफेदी कारागारका जेलर र उनकी पत्नीविरुद्ध मुद्दा
काठमाडौँ– कारागार कार्यालय भिमफेदी मकवानपुरका जेलर चिरञ्जिवी थापा र उनकी पत्नीविरुद्ध मुद्दा दायर भएको छ । अख्तियार दुरुपयोग अनुसन्धान आयोगले थापा र उनकी पत्नी गोमा कट्टेल थापाविरुद्ध आइतबार विशेष अदालतमा मुद्दा दायर गरेको हो ।
आयोगकाअनुसार थापाले सार्वजनिक सेवामा प्रवेश गरेदेखि गत आर्थिक वर्षसम्म आर्जन गरेको वैध आयको तुलनामा सम्पत्ति सिर्जना र विविध खर्च कटाउँदा एक करोड १३ लाख ६० हजार चार सय १० रुपैयाँ ९५ पैसाको स्रोत नखुलेको पाइएपछि भ्रष्टाचार मुद्दा दायर गरिएको हो ।
जेलर थापाले गैरकानुनी रुपमा आर्जन गरेको सम्पत्ति आफू लगायत आफ्नी पत्नी गोमा कट्टेल थापाको नाममा दर्ता कायम हुने गरी खरिद गरी राखेको भन्दै आयोगले गोमालाई समेत प्रतिवादी बनाएर मुद्दा दायर गरेको हो ।
आयोगले थापाविरुद्ध एक करोड १३ लाख ६० हजार चार सय १० रुपैयाँ ९५ पैसा बिगो कायम गरी बिगो बमोजिम जरिवाना र कैद सजाय माग गर्दै मुद्दा दायर गरेको प्रवक्ता प्रदीपकुमार कोइरालाले जनाए । उनका अनुसार अभियोगपत्रमा स्रोत खुल्न नसकेका उनका सम्पत्ति जफत गर्नसमेत माग गरिएको छ ।