सुस्त मनस्थितिका गंगाबहादुर जासुुसीको आरोपमा भारतमा पक्राउ
काठमाडौँ । सुस्त मनस्थितिका एक नेपाली नागरिकलाई भारतमा जासुसीको आरोपमा पक्राउ गरिएको छ ।
गुल्मी घर भएका गंगाबहादुर बोल्न र सुन्न सक्दैनन् । भारतीय अखबार हिन्दुस्तान टाइम्सका अनुसार भारतीय सुरक्षाकर्मीका विभिन्न निकायले केही दिन यता उनीसँग सोधपुछ गरिरहेका छन् । उनलाई पाकिस्तानी गुप्तचर एजेन्सी ‘आईएसआई’को एजेन्ट भएको आशंकामा नियन्त्रणमा लिएर अनुसन्धान थालेको सो अखबारले भारतीय सुरक्षा निकायलाई उद्धृत गर्दै जनाएको छ ।
भारतीय अनुसन्धान ब्यूरोका अनुसार उत्तर प्रदेशको बरेलीबाट उनलाई नियन्त्रणमा लिइएको हो । विगत ८ वर्षदेखि लखनउमा बस्दै आएका उनी गत सेप्टेम्बरदेखि बरेलीमा दैनिक दुई सय रुपैयाँ तिरेर एउटा होटलमा बस्दै आएको बताइन्छ ।
उनको साथबाट दुई वटा मोबाइल फोन बरामद भएको जनाइएको छ । उनी फेसबुक र अन्य सोशल नेटवर्किङ साइटमा समेत सक्रिय रहेको भारतीय सुरक्षाकर्मीको दावी छ ।