इराकको राजधानी बगदादसमेत विभिन्न इलाकामा रकेट हमला भएको इराकी सेनाले जानकारी दिएको छ । यी रकेट हमला अमेरिकी दूतावास नजिकैको ग्रीन जोन, बगदाद नजिकैको जदरिया र अमेरिकी सुरक्षाबल भएका बलाद एयरबेसमा भएको हो ।

सेनाले यी हमलामा कसैको पनि मृत्यु नभएको बताएको छ । इरान समर्थित मिलिशिया लडाकूले केही हप्ताअघि यस्तो हमला गरेको थियो । तर अब अमेरिकाको हवाइ हमलामा इरानका कमान्डर कासिम सुलेमानी मारिएपछि यो तनावमा थप वृद्धि भएको छ ।

कताइब हिजबुल्ला मिलिशियाले एक बयान जारी गरेको छ जसमा उसले इराकी सेनालाई आइतबार बेलुकासम्म अमेरिकी बेसबाट कम्तीमा एक हजार मिटर पछि हट्न भनेको थियो ।

यस्तै, इराकी पुलिसले जदरियामा मिसाइलको हमलामा पाँचजना घाइते भएको जानकारी दिएको छ । यसबाहेक अरु कुनै क्षतीको खबर उल्लेख छैन ।

अर्कोतर्फ समाचार एजेन्सी रोयटर्सले इराकी सेनालाई उद्धृत गर्दै यी रकेट ग्रीन जोन नजिकै जदरिया र अमेरिकी सुरक्षाबल भएको एयरबेसमा खसेको जानकारी दिएको छ । रोयटर्सले पनि यसमा कसैको मृत्यु नभएको जानकारी दिएको छ ।

शुक्रबार बगदाद एयरपोर्ट नजिकै भएको अमेरिकी हमलामा इरानका सैन्य कमान्डर जनरल कासिम सुलेमानीसमेत इरानको समर्थन भएको कताइब हिज्जुबुल्लाह गुटका कमान्डर अबु महदी अल–मुहांदिसको पनि मृत्यु भएको थियो ।

सुलेमानी इरानको बहुचर्चित कुड्स फोर्सका कमान्डर थिए ।