भिजिट नेपाल
-दिल थापा
ऋतुहरुले प्रकृतिको रङ प्रयोग गरेर
मेरा देशका हिमालमा
तराईका फाँट
अनि हिमाल र तराईको
न्यानो मायाँ पाएको पहाडहरुमा
आँखा र मनलाई खुसी बनाउने दृश्य कुँदिरहन्छ ।
कलाकारले जस्तै
लाग्छ मेरो देश
एउटा खुला आर्ट ग्यालरी हो
भौतिकवादी नसाले मन आत्तिएको भए ।
मनको कुनाबाट मेरो देशको
प्राकृतिक मनोरम दृश्यलाई कल्पना गरेको भए
भिजिट नेपाल ।
एकाबिहानै उदाएको कलिलो घामले
सधैँ मेरो घरको बाटो भएर
सगरमाथाको शिखर चुम्ने यात्रा गर्छ
छिटो सूर्य उदाउने देशको अनुमति लिएर
मेरो घरको बाटो घमाइलो बनाउँछ ।
माछापुच्छ«े हिमाललाई
फेवातालको मञ्चमा मञ्चन गराउँछ
हिमालका कथा सुन्न मन भए
हिमालहरु जलवायु प्रदूषणसँग
कसरी जुढिरहेको छ ? हेर्ने मन भए ।
घामले सधँै सगरमाथा चुमेको हेर्ने भए
भिजिट नेपाल ।
विश्व मानचित्रमा सानो मेरो देश
तराईमा लहलह झुलेको
धानको बालाको एउटा दानाजस्तै लाग्छ
रारातालको एक थोपा पानीजस्तै पनि लाग्छ ।
अनि कहिले लाग्छ
मेरी प्रियसीले पहाडको घुमाउने घरको
साँघुरो आँगनमा रोपेको
रङ्गीबिरङ्गी फूल जस्तै
मेरो सानो देश
बहुजातिको देश
बहुभाषिक र बहुसंस्कृतिले
सजिएको देश ।
भिन्न भिन्न पहिचानले चिनिएको देश
नजिकबाट नियाल्न मन भए
भिजिट नेपाल ।