अमेरिकी क्रिकेट टोली आज आउने
आइतबार, १९ माघ २०७६, १२ : ४३
काठमाडौँ । माघ २२ देखि २९ गतेसम्म कीर्तिपुरमा आयोजना हुने आइसीसी विश्वकप लिग–२ अन्तर्गत नेपाल, अमेरिका र ओमनबीचको त्रिकोणात्मक क्रिकेट सिरिज खेल्नका लागि अमेरिकी टोली आइतबार (आज) साँझ काठमाडौँ आउँदैछ ।
दुई सातादेखि भारतमा तयारी गरिरहेको अमेरिकी टोली आज साँझ ८ बजे नेपाल आउने नेपाल क्रिकेट सङ्घ (क्यान) ले जनाएको छ । ओमन भने सोमबार नेपाल आउने बताइएको छ ।
भारत, अष्ट्रेलिया र अफ्रिकन मुलका खेलाडीको बाहुल्यता रहेको अमेरिकी टोलीका खेलाडीहरुमा सौरभ नेट्रावाल्कर (कप्तान), स्टेभेन टेलर, करिमा गोरे, इयान होल्यान्ड, अक्षय होमराज, एल्मोरे हट्चिनसन, आरोन जोन्स, नोस्थुश केन्जिगे, जेभिएर मार्शल, मोनाङक पटेल, तिमिल पटेल, निसराग पटेल, क्यामरोन स्टेभेन्सन र रस्टी थेरन रहेका छन् ।