कलंकीको अन्डरपासमा दुई जनाको ज्यान लिने चालक सिन्धुपाल्चोकबाट पक्राउ
काठमाडौँ । बुधबार राति कलंकीको अन्डरपासमा बा४ख ८५७९ नम्बरको टिपरले प्रदेश २–०३००४ प ५५० नम्बरको मोटरसाइकललाई ठक्कर दिँदा दुई जनाको ज्यान लिने चालकलाई प्रहरीले पक्राउ गरेको छ ।
बिहीबार राति प्रहरीले २६ वर्षीय अनिल लामालाई सिन्धुपाल्चोकबाट पक्राउ गरी शुक्रबार बिहान काठमाडौँ ल्याएको महानगरीय प्रहरी परिसर काठमाडौंका एसएसपी उत्तमराज सुवेदीले बताए ।
मोटरसाइकललाई ठक्कर दिएर चालक लामा टिपरसहित फरार भएका थिए । टिपर बिहीबार दिउँसो प्रहरीले नख्खुस्थित चन्द्र सूर्य ग्यारेजमा लुकाइएको अवस्थामा फेला परेको थियो ।
सीतापाइलाबाट बल्खुतर्फ गइरहेको टिपरको ठक्करबाट मोटरसाइकल चालक रौतहट कटहरिया गाउँपालिका–४ का १९ वर्षीय राजेशकुमार चौधरी र पछाडि बसेका कटहरिया–७ का २४ वर्षीय मुन्ना चौधरीको ज्यान गएको थियो ।
पक्राउ परेका चालकमाथि अथप अनुसन्धान भइरहेको प्रहरीले जनाएको छ ।