कविता : सालिक
शनिबार, १० फागुन २०७६, ११ : ४६
-सुवास चौलागाईं
के सालिक अस्तित्व हो ?
या इतिहासको साक्षी !
आखिरी समाजमा
किन सालिक
ठडाइए ?
केका लागि ठडिए त सालिकहरु ?
मालिकहरुले सम्मानित गर्न ?
वा भोको पेट भर्न !
त्यही सहिदका सालिक छेउ
बसेर बूढी आमा
नाङ्लामा सामान राखेर
ग्राहक पर्खिरहेको सन्नाटा देख्दा
मेरो मनमा प्रश्न उठ्छ
के गरौँ त म
उत्तरका लागि ?
शालिक भत्काउ या
मालिक छप्क्याऊँ
ती आमासँग बसेर रोउ
या सालिकका कर्म सम्झेर
तिनका बिराट अस्तित्व छोऊ
आखिरी के गरौँ म ?
मसँग प्रश्नमाथि प्रश्न थपिन्छन्
चोक चोकका सालिकको खबर बुझ्न
निस्किँदा नोट सकिन्छन्
यस्ता कुरा सुनाउँदा
साथी भाइ, दिदी बहिनी
इस्टमित्र गम्किन्छन् ।