वैदेशिक रोजगारः ठगी मुद्दाका फरार अभियुक्त पक्राउ
काठमाडौँ । प्रहरीले वैदेशिक रोजगार ठगीका फरार अभियुक्तलाई पक्राउ गरेको छ । पक्राउ पर्नेमा सिन्धुपाल्चोकको बलेफी गाउँपालिका–६ घर भई काठमाडौँ बौद्ध बस्ने २८ वर्षीय भीमबहादुर तामाङ रहेका छन् ।
महानगरीय अपराध महाशाखाका प्रमुख तथा प्रहरी बरिष्ठ उपरीक्षक (एसएसपी) दीपक थापाका अनुसार खोजी सूचीमा रहेका तामाङलाई बौद्धबाट पक्राउ गरेको हो ।
तामाङमाथि रोजगारीको लागि विदेश पठाइदिने भन्दै सिर्जना दोङलगायत केही व्यक्तिहरुबाट ४६ लाख ५० हजार रुपैयाँ लिई फिर्ता नगरेको अभियोग लागेको थियो ।
उनलाई ठगी मुद्दामा वैदेशिक रोजगार न्यायाधीकरणको २०७४ भदौ ११ गते एक लाख ५० हजार रुपैयाँ जरिवाना र १ वर्ष ६ महिना कैद सजाय हुने ठहर गरेको थियो ।
अहिले तामाङलाई प्रहरीले काठमाडौँ जिल्ला अदालत बबरमल पठाइएको जनाएको छ ।
सोही मुद्दाका अर्का फरार प्रतिवादी तुलबहादुर तामाङलाई असोज १६ गते डिल्लीबजारबाट पक्राउ गरेको एसएसपी थापाले जानकारी दिए ।