कांग्रेस, एमाले र माओवादीको चुनावी टक्करले गुल्मीका रेडियो मालामाल
गुल्मी– स्थानीय तहको दोस्रो चरणको चुनाव आउन मात्र ६ दिन बाँकी रहँदा गुल्मीका राजनीतिक दलहरुले चुनावी प्रचारप्रसार अभियानलाई तीब्र पारेका छन् ।
उम्मेदवारहरुले घरदैलो अभियान र सभासम्मेलन मात्रै होइन सामाजिक सञ्जालदेखि आमसञ्चारमाध्यमसमेतलाई प्रयोग गरेर माहोल तताइरहेका छन् ।
चुनावी रिपोर्टिङका क्रममा रातोपाटी टीम गुल्मीका विभिन्न गाउँपालिकामा पुग्दा उम्मेदवारहरुले प्रचारप्रसार अभियानलाई तीब्र पारेको पाइयो । उनीहरुले अभियानलाई तीब्र पार्दै गर्दा नतिजा आफ्नो पक्षमा आउने दाबी समेत गरेका छन् ।
बिहिबार दिउँसो रातोपाटी टीम गुल्मीको रुरु गाउँपालिका पुग्दा उम्मेदवारहरु प्रचारप्रसारमा जुटिरहेका देखिन्थे भने मतदाताहरु पनि कसको पक्षमा माहोल रहेको र कसले चुनाव जित्ला भनि चियापसलदेखि चौतारीसम्म छलफल र बहसमा देखिन्थे ।
रुरु गाउँपालिकामा एमालेको एकल उम्मेदवारी पर्दा माओवादी र कांग्रसबीच गठबन्धन रहेको छ । एमालेका प्रभावशाली नेता प्रदीप ज्ञवालीलाई हराउँदै दोस्रो संविधानसभा निर्वाचनमा चन्द्र भण्डारीले बाजी मारेको क्षेत्र पनि हो, रुरु गाउँपालिका । दुई नेताको प्रतिष्ठाको समेत सवाल रहेका कारण यो गाउँपालिकामा कसले बाजी मार्छ भनि समग्र गुल्मीबासीले नै चासोका साथ हेरेका छन् ।
रुरु गाउँपालिकामा एमालेका तर्फबाट निलकण्ठ गौतम र उपप्रमुखमा लक्ष्मी पुनको उम्मेदवारी परेको छ । यस्तै माओवादी केन्द्र र कांग्रेस गठबन्धनबाट माओवादीका यदु ज्ञवालीको प्रमुखमा उम्मेदवारी परेको भने उपप्रमुखमा कांग्रेसका देवीन्द्र मल्लको उम्मेदवारी परेको छ ।
माओवादी– कांग्रेस गठबन्धनले बेराजगारीको समस्या समाधान, स्थानीय स्तरमा रोजगारीको सिर्जना गर्नेदेखि विकास निर्माणका एजेण्डा उठाएका छन् । माओवादी केन्द्रका प्रमुखका उम्मेदवार यदुले त आफूले गाउँपालिकाको अध्यक्ष जितेको खण्डमा हरेक नागरिकले २० हजार मासिक आम्दानी दिलाउने योजना आफूसँग रहेको बताए ।
एजेण्डाका हिसावले कांग्रेस–माओवादी गठबन्धनको पनि उस्तै खालको योजना रहेका छ । एमालेका गाउँपालिका प्रमुखका उम्मेदवार निलकण्ठ गौतमले बेरोजगारीको समस्या समाधान, खानेपानी, बृद्धभत्ता लगायतका विषय नै आफ्नो मुख्य एजेण्डा रहेको बताए ।
प्रचारमा होडबाजी
रुरु क्षेत्रमा भेटिएका स्थानीय श्याम गौतमले चुनाव नजिकिएसँगै जिल्लाबाट सञ्चालित एमएमहरुले अरु विज्ञापन छाडेर हालका दिनमा राजनीतिक दलको प्रचारमै व्यस्त रहेको बताए । उनले भने– यहाँका एफएम रेडियोले बिहान खुलेदेखि बन्द नभएसम्म राजनीतिक दलकै प्रचारप्रसार गर्छन् ।’
उनका अनुसरा प्रचारप्रसारमा कांग्रेस माओवादी र एमाले अग्रस्थानमा रहेका छन् । उनीहरुले एफएमबाट प्रचारमा मात्रै लाखौं रकम खर्च गरेको जानकारहरु बताउँछन् । यसले एकातिर राजनीतिक दलहरुलाई आफ्नो एजेण्डा आम सर्वसाधारणसम्म पुर्याउन सहज भएको छ भने आर्थिक रुपमा पनि आफूहरुलाई पाइदा पुगेको जिल्लाका एक एफएम सञ्चालकले बताए । तर, रकम पाइने लोभमा कतिपय एफएम रेडियोले आचारसंहिता विपरितका प्रचारसमेत गरिरहेको बताइन्छ ।
गुल्मीमा रेडियो रेसुंगा, रेडियो गुल्मी, रेडियो स्काई, रुरु एफएम, सेडियो पुष्पाञ्जिली, पहिलो एफएम, ऋषिकेश एफएमलगायत जिल्लाका प्रमुख एफएम स्टेसन हुन् ।
साना दललाई समस्या
कांग्रेस, माओवादी र एमालेले सबै विधि अपनाएर प्रचारप्रसार तीब्र पारेपनि साना दलहरु भने समस्यामा परेका छन् । आर्थिक अभावका कारण न त उनीहरुले ठूला खालका कार्यक्रम गर्न पाएका छन् न त रकम खर्चिएर विज्ञापन नै बजाउन सकेका छन् । पार्टीको भूगोलमा बलियो उपस्थिति समेत नभएको र प्रचारप्रसार समेत प्रभावकारी हुन नसक्दा चुनाव जित्न गाह्रो रहेको जनमोर्चाका एक उम्मेदवारले बताए । यसो त रुरुका श्याम गौतमले पनि प्रचार प्रसारमा पछाडि देखिएका उम्मेदवारले हार्ने खतरा देखिएको बताए । उनले भने– सबै एमएफमा कांग्रेस, एमाले र माओवादीका चुनावी प्रचार भइरहेका छन् । जसले रेडियोमा विज्ञापन दिएन र फिल्डमा राम्रो उपस्थिति देखाउन सकेको छैन त्यसले हार्ने जस्तो देखिइएको छ।
रुरु गाउँपालिकामा साविकको रुरु, ग्वाडी, खानापति, बलेटक्सार, बम्घा र रिम्बुवा गाविस मिलेर बनेको गाउँपालिका हो ।
चन्द्र गर्जिए, ज्ञवाली कता गए ?
आफ्नै क्षेत्र भएपनि चुनावी अभियानमा एमाले सचिव प्रदीप ज्ञवाली अहिलेसम्म रुरु पुगेका छैनन् । बरु यसअघिको निर्वाचनमा ज्ञवालीलाई हराउँदै विजयी भएका कांग्रेस नेता चन्द्र भण्डारी भने माहोल बनाउन जुटिसकेका छन् । केहि दिनअघि मात्रै बलेटक्सारमा आयोजित एक कार्यक्रममा उनले एमालेले कम्युनिष्ट झण्डा छाडिसकेको भन्दै अब माओवादी कांग्रेसको गठबन्धनलाई कसैले हराउन नसक्ने दाबी गरेका थिए ।
गुल्मीमा १० गाउँपालिका र २ नगरपालिका रहेका छन् भने ती स्थानीय तहमा ठूला पार्टीकै बीचमा कडा टक्कर पर्ने बताइएको छ ।
उम्मेदवारको सकारात्मक प्रतिबद्धता
दलहरु अहिले जति आफ्नो पक्षमा माहोल बनाउन जुटिरहेका छन् त्यो राजनीतिक विषय रह्यो तर उनीहरुले चुनाव जसले जितेपनि एकले अर्कालाई सहयोग गरेर अघि बढ्ने प्रतिबद्धता जनाएका छन् । रातोपाटीसँगको अन्तरक्रियाका क्रममा उनीहरुले यस्तो प्रतिबद्धता जनाएका हुन् । माओवादी केन्द्र रुरु गाउँपालिकाका उम्मेदवार यदु ज्ञवालीले चुनावी प्रतिश्पर्धामा जसले जिते पनि गाउँ बनाउन सबै हातेमालो गरेर अघि बड्ने बताए । यस्तै प्रतिबद्धता एमाले उम्मेदवार ज्ञवालीले पनि जनाउँदै विकासका लागि सबै मिलेर अघि बढ्नुपर्ने र त्यसका लागि आफ्नो पार्टीबाट राजनीतिक प्रतिशोध साध्ने काम नहुने बताए ।
देशका विभिन्न स्थानीय तहमा राजनीतिक पूर्वाग्रहकै कारण विकास निर्माण बाधा पुगेको भन्ने खालका समाचार समेत सार्वजनिक हुने गरेको बेलामा रुरु गाउँपालिकाका यी उम्मेदवारहरुले गरेको प्रतिबद्धता साँच्चै नै सह्रानीय रहेको छ ।