ए !
हाम्रो पहिरनमा अङ्कुश लगाउन खोज्नेहरू हो,
हाम्रा लवजमा मधुरता, सीमितता खोज्नेहरू हो ।
ए !
समानता र सशक्तीकरणका भजन गाउनेहरू हो,
कहिले बारमा, कहिले हाम्रा हारमा 
हामीलाई मदहोसीको मिठाई चखाउँदै
ढोँगी नाच नाच्ने बहानामा 
हाम्रा शरीरका अङ्गलाई 
वधशालामा बेच्न राखिएको मासुको भागझैँ
मूल्य तोक्न खोज्नेहरु हो ।
ए !
कामका बाहनामा 
आफ्नो कामवासना पूरा गर्न 
हामीसँग यौनक्रीडा गर्न तम्तयार भएका
मान्छेका मुकुटधारी नरपिशाच हो ।
ए !
महिलालाई भान्साको चार कुरामा कैद गरी 
बाहिरी संसारको सुगन्धसम्म पस्न नदिने,
दुर्गन्धित शोषकवर्ग हो । 
ए !
तिरस्कार सहन गर्न नसकी 
चेहराको रङ्ग बदल्न एसिडको सहारा लिने 
कमजोर मानसिकताका रोगीहरु हो ।

जब तिम्रो निरङ्कुशताले,
तिम्रो नियमहरूको सर्वोच्चताले 
तिम्रो समाजहरुको उग्रगन्धताले 
बन्धनको सीमा नाघ्ने प्रयास गर्दछ
तब हरेक नारी सीताको रूपधारी 
नग्न उभिने छन् अग्निपरीक्षाका लागि 
र
भत्किने छन् बाँधहरू 
जसमा दोहन हुनेछ तिम्रो 
स्थायित्व, स्वामित्व र अस्तित्वको धरोहरहरु ।
भासिने छन्
ती सब, सीताले फटाएको धर्तीमा 
र 
त्यसभित्रबाट गुन्जिनेछ एउटा नारा 
‘नारीवाद जिन्दावाद !’ 

काँडाघारी, काठमाडौँ
सिभिल इन्जिनियरिङ दोस्रो वर्ष, पुल्चोक क्याम्पस ।