लोकतन्त्रप्रेमी युवालाई एउटै एजेन्डामा एकाकार हुन अध्यक्ष बस्नेतको आह्वान
बिहीबार, २८ साउन २०७८, ११ : ५९
नेपाली काँग्रेसको भ्रातृ संगठन नेपाल तरुण दलले लोकतन्त्र प्रेमी युवालाई एउटै एजेन्डामा एकाकार हुन आह्वान गरेको छ। अन्तराष्ट्रिय युवा दिवसको अवसरमा शुभकामना सन्देश जारी गर्दै तरुण दल अध्यक्ष जीतजंग बस्नेतले यस्तो आह्वान गरेका हुन् ।
‘संविधान र लोकतन्त्रको संरक्षण गर्दै नेपालको आर्थिक विकास र समृद्धि पथमा मुलुकलाई अगाडि बढाउन नेपाली कांग्रेसको काँधमा आइपरेको जिम्मेवारीलाई सहर्ष पूरा गर्न नेपाल तरुण दल केन्द्रीय समिति यसै शुभकामना सन्देशमार्फत सम्पूर्ण लोकतन्त्रप्रेमी युवालाई एउटै एजेन्डामा एकाकार हुन आव्हान गर्दछ,’ शुभकामना सन्देशमा भनिएको छ।
युवाको सहभागिता र संलग्नता बिना संसारका कुनै पनि परिवर्तनहरुले संस्थागत रुप लिएर दिगो हुन नसकेको बस्नेतको भनाइ छ । युवा वर्तमानको साक्षी र भविष्यको मेरुदण्ड भएको बस्नेतले बताए ।