मोरङमा मोदी, शेखर, लालबाबु र मिनेन्द्र : कसको अवस्था कस्तो छ ?
काठमाडौँ । मोरङमा दोस्रो चरणमा आगामी मङ्सिर २१ गते प्रतिनिधि सभा र प्रदेशसभाको निर्वाचन हुँदैछ । यहाँ प्रतिनिधि सभा निर्वाचनका लागि ६ क्षेत्र रहेका छन् भने जिल्लामा कूल ६ लाख ४४ हजार ७ सय ८५ मतदाता छन् ।
काङ्ग्रेसको आधार क्षेत्र रहेको मोरङमा एमाले र माओवादी केन्द्रले तालमेल गरेर चुनावी मैदानमा होमिएपछि नेपाली काङ्ग्रेसको साइज घट्ने अनुमान गरिएको छ ।
मोरङ क्षेत्र नं. १ : घनश्याम खतिवडा र डिकबहादुर लिम्बुको प्रतिष्पर्धा
मोरङ क्षेत्र नं. १ मा आगामी प्रतिनिधि सभा निर्वाचनका लागि वाम गठबन्धनबाट एमालेका घनश्याम खतिवडा, नेपाली काङ्ग्रेसका डिकबहादुर लिम्बु र सङ्घीय समाजवादी फोरमका देवेन्द्र श्रेष्ठ चुनावी प्रतिस्पर्धामा छन् । क्षेत्र नंं. १ मा १ लाख ७ हजार २ सय ३५ मतदाता रहेका छन् ।
गत स्थानीय तहको निर्वाचनका विभिन्न राजनीतिक दलले स्थानीय तह प्रमुख र वडा अध्यक्षले पाएको मतका आधारमा मोटोमोटी रूपमा दलहरूको अवस्था बुझ्ने प्रयास गरेका छौँ । क्षेत्र नं. १ मा नेपाली काङ्ग्रेसले २७ हजार ६ सय ९७ मत पाएको थियो । यस्तै नेकपा एमालेले २५ हजार ६ सय ४४, माओवादी केन्द्रले ७ हजार ४ सय १९, नयाँ शक्तिले ३७, राप्रपाले ४ सय ९५, फोरम लोकतान्त्रिकले ३८ र सङ्घीय समाजवादी फोरमले ६३ मत पाएको थियो ।
यस आधारमा यहाँ वाम गठबन्धनको पक्षमा ३३ हजार ६३ मत छ । यहाँ नेपाली काङ्ग्रेसले प्राप्त गरेको मतभन्दा ५ हजार ३ सय ६६ हाराहारी मतले बाम गठबन्धन अगाडि रहेको छ ।
मोरङ क्षेत्र नं. २ : पूर्व मन्त्री मिनेन्द्र रिजाल र ऋषिकेश पोखरेलको भिडन्त
आगामी निर्वाचनका लागि मोरङ क्षेत्र नं. २ मा १ लाख ११ हजार ३ सय २१ मतदाता रहेका छन् । यो निर्वाचन क्षेत्रमा वाम गठबन्धनबाट एमालेका ऋषिकेश पोखरेल, नेपाली काङ्ग्रेसका मिनेन्द्रप्रसाद रिजाल र सङ्घीय समाजवादी फोरमका युवराज कार्कीबीच प्रर्तिष्पर्धा हुँदैछ ।
गत स्थानीय तहको निर्वाचनमा मोरङ २ मा मोटामोटी रूपमा नेपाली काङ्ग्रेसले २२ हजार ९ सय ८०, नेकपा एमालेले १९ हजार १७, माओवादी केन्द्रले १२ हजार २ सय ८२, नयाँ शक्तिले ४ सय ४९, राप्रपाले २ हजार ७ सय ९, फोरम लोकतान्त्रिकले ७ सय ९१ र सङ्घीय समाजवादी फोरमले ३ हजार ६ सय ५३ मत ल्याएको थियो ।
यस आधारमा यहाँ वाम गठबन्धनको पक्षमा ३१ हजार २ सय ९९ मत रहेको छ । नेपाली काङ्ग्रेसको मतमा फोरम लोकतान्त्रिकले पाएको मत मिसाउँदा २३ हजार ७ सय ७१ हुन्छ, जुन वाम गठबन्धनको मतभन्दा १० हजार २ सय ३७ कम हो । यस आधारमा हेर्दा मोरङ क्षेत्र नं. २ मा वाम गठबन्धनलाई पराजित गर्न नेपाली काङ्ग्रेसलाई कठिन पर्ने देखिन्छ ।
मोरङ क्षेत्र नं. ३ : भानुभक्त ढकाल र सुनिल शर्माको प्रतिस्पर्धा
मोरङ क्षेत्र नं.३ मा आगामी निर्वाचनका लागि १ लाख २७ हजार ४ सय ९६ मतदाता रहेका छन् । वाम गठबन्धनबाट एमालेका भानुभक्त ढकाल, नेपाली काङ्ग्रेसका सुनिलकुमार शर्मा र सङ्घीय समाजवादी फोरमका लोक सागर साँवा बीच चुनावी प्रतिष्पर्धा हुँदैछ ।
गत स्थानीय तहको निर्वाचनका मोरङ क्षेत्र नं. ३ बाट मोटामोटी रूपमा नेपाली काङ्ग्रेसले २२ हजार ६ मत पाएको थियो भने नेकपा एमालेले २९ हजार १ सय ७३, माओवादी केन्द्रले १३ हजार ४ सय ९८, नयाँ शक्तिले ७ सय १०, राप्रपाले ५ सय ३५, सङ्घीय समाजवादी फोरमले ३५ र फोरम लोकतान्त्रिकले ११ सय २ मत पाएको थियो ।
यस आधारमा यहाँ वाम गठबन्धनको पक्षमा ४२ हजार ६ सय ७१ मत रहेको छ । जुन नेपाली काङ्ग्रेसले पाएको मत भन्दा २० हजार ६ सय ६५ मत धेरै देखिन्छ । स्थानीय तहमा राजनीतिक दलले पाएको मत प्रतिनिधि सभा निर्वाचनका बेला केही फरक परे पनि यहाँ वाम शक्ति नै बलियो हुने देखिएको छ ।
मोरङ क्षेत्र नं. ४ : महेश आर्चाय र मोदीको भिडन्त
आगामी प्रतिनिधि सभा र प्रदेश सभा निर्वाचनका लागि मोरङ क्षेत्र नं.४ मा ९९ हजार १ सय २४ मतदाता रहेका छन् । यो क्षेत्रमा वाम गठबन्धनका तर्फबाट माओवादी केन्द्रका अमनलाल मोदी, नेपाली काङ्ग्रेसका महेश आर्चाय र सङ्घीय समाजवादी फोरमका तर्फबाट लोक सागर साँवा चुनावी प्रतिष्पर्धामा रहेका छन् ।
गत स्थानीय तहको निर्वाचनमा प्रमुख तथा वडाध्यक्षहरूले पाएको मतका आधारमा क्षेत्र नं। ४ मा मोटामोटी रूपमा नेपाली काङ्ग्रेसले १७ हजार १, नेकपा एमालेले १७ हजार ९ सय ३३, माओवादी केन्द्रले ६ हजार १ सय ३१, राप्रपाले १६ सय ३, फोरम लोकतान्त्रिकले ८ हजार २ सय १ र सङ्घीय समाजवादी फोरमले ४ हजार २ सय २८ मत पाएको थियो । यस आधारमा यहाँ वाम गठबन्धनको पक्षमा २४ हजार ६४ मत देखिन्छ । यस्तै हालसालै नेपाली कांग्रेसमा बिलय भएको फोरम लोकतान्त्रिकले पाएको मत नेपाली कांग्रेसले पाएको मतमा मिसाँउदा २५ हजार २ सय २ हुन्छ । अर्थात यहाँ नेपाली कांग्रेस ११ सय ३८ मतले अगाडि देखिन्छ । यहाँ राप्रपाले १२ सय ३ मत ल्याएको थियो । लोकतान्त्रिक गठबन्धनमा समेत रहेको राप्रपाको मत नेपाली कांग्रेसलाई जाने हो भने बाम गठबन्धन २ हजार हाराहारी मतले पछि पर्ने देखिन्छ ।
मोरङ क्षेत्र नं. ५ : विनाविभागीय मन्त्री मण्डल र अमृत अर्यालको प्रतिस्पर्धा
आगामी निर्वाचनका लागि मोरङ क्षेत्र नं. ५ मा ८९ हजार २ सय ८७ मतदाता रहेका छन् । वाम गठबन्धनबाट माओवादी केन्द्रका शिवकुमार मण्डल, नेपाली काङ्ग्रेसका तर्फबाट अमृतकुमार अर्याल र सङ्घीय समाजवादी फोरमबाट राजकुमार यादव प्रतिस्पर्धामा छन् ।
गत स्थानीय तहको निर्वाचनमा यो क्षेत्रबाट नेपाली काङ्ग्रेसले १३ हजार ७ सय ३०, नेकपा एमालेले १० हजार ४ सय ९३, माओवादी केन्द्रले १० हजार २ सय २३, नयाँ शक्तिले ६७, राप्रपाले १ हजार ३ सय १७, फोरम लोकतान्त्रिकले २ हजार ४ सय ६५ र सङ्घीय समाजवादी फोरमले १४ हजार १ सय ८ मत पाएको थियो ।
यस आधारमा हेर्दा यो क्षेत्रमा वाम गठबन्धनको पक्षमा २० हजार ७ सय १६ मत रहेको छ भने नेपाली काङ्ग्रेस र फोरम लोकतान्त्रिकको मत जोड्दा १६ हजार १ सय ९५ मत पाएको थियो जुन वाम गठबन्धनको भन्दा ४ हजार ५ सय २१ मत कम हो ।
मोरङ क्षेत्र नं. ६ : पूर्वमन्त्री लालबाबु पण्डित र शेखर कोइरालाको लडाइँ
यो निर्वाचन क्षेत्रमा आगामी निर्वाचनका लागि १ लाख १० हजार ३ सय २२ मतदाता रहेका छन् । यहाँ वाम गठबन्धनबाट एमालेका लालबाबु पण्डित र नेपाली काङ्ग्रेसबाट डा. शेखर कोइरालाबीच प्रतिस्पर्धा हुँदैछ । पण्डित पूर्व सामान्य प्रशासन मन्त्री हुन भने कोइराला नेपाली काङ्ग्रेसका केन्द्रीय सदस्य हुन् ।
गत स्थानीय तहको निर्वाचनमा मोरङ क्षेत्र नं. ६ मा नेपाली काङ्ग्रेसले १९ हजार ८ सय २, नेकपा एमालेले १८ हजार १ सय ६८, माओवादी केन्द्रले ८ हजार ६८, राप्रपाले २ हजार ५ सय ९९, फोरम लोकतान्त्रिकले ८ हजार १ सय ९६ र सङ्घीय समाजवादी फोरमले ४ हजार ६ सय ७७ मत पाएका थिए ।
यस आधारमा यहाँ वाम गठबन्धनको पक्षमा २६ हजार २ सय ३६ मत रहेको छ भने नेपाली काङ्ग्रेस फोरम लोकतान्त्रिकले पाएको मत हिसाब गर्दा २७ हजार ९ सय ९८ मत रहेको छ । यस आधारमा यहाँ वाम गठबन्धनभन्दा नेपाली काङ्ग्रेस १७ सय ६२ मतले अगाडि रहेको छ । लोकतान्त्रिक गठबन्धनमा रहेको राप्रपाको २५ सय ९९ मत छ ।
स्थानीय तहमा पाएको मतका आधारमा मोरङ क्षेत्र नं. ६ मा नेपाली काङ्ग्रेस र वाम गठबन्धनबीच कडा प्रतिस्पर्धा हुने आंकलन गर्न सकिन्छ ।